Chak nuamsa Elena Rybakina

Melbourne Park-a a bultanna inkhelah sixth seed Elena Rybakina chuan nimin khan minute 53 lek chhungin Australian tleirawl Emerson Jones lakah 6-1 6-1 hnehna changin, second round-ah kum 2022 Wimbledon champion hian American tleirawl kum 17 mi lek, wildcard entry hmanga main draw thleng ve chauh Iva Jovic a tum leh ang.
Nikuma world number three lai rawn hawlh pha Rybakina hian kum 2023 khan Melbourne-ah hian final lutin, runner-up a ni a, kuminah he major tournament-a a thlen san ber hun atangin hmasawnna a tawngbo zo dawn em kan thlir zui zel ang!
Tualchhung tleirawl a sawpna kawngah Kazakh Rybakina khan ace 11 neiin, chutih kawngah chuan vawili ngawt ace a nei zawn a, winners 26 zet hlap bawkin, inkhelh banah a coach chhawr lai Goran Ivanisevic nge amah chu ‘serve’ nei tha zawka a hriat tih an zawt fiam a, fiamthu let pahin Rybakina chuan, “Practice court lamah ka cho chhin phawt a ngai dawn a, tah chuan kan hria ang chu,” a ti.
2001 Wimbledon champion Ivanisevic hi a ‘serving’ pui tak avanga hriat hlawh thin a ni.
Tun hi Novak Djokovic-a coach hlui Ivanisevic a rawih hnuah Rybakina tan Grand Slam tournament a khelh vawikhatna niin, a tir takah chuan Rybakina hian a team-ah Stefano Vukov hruaikira Melbourne pan a tum a, mahse, Croat hi WTA lamin player-te laka a chet dan avangin an chhui mek a, an ‘suspend’ lailawk rih avangin coaching a chawlhsan rih a ngai a ni.
Vukov hian tihsual a neih loh thu a sawi bakah a enkawl thin Rybakina ngei pawhin a coach laka ‘complaint’ a neih ngai loh thu a sawi ve tawh bawk.
Nimin inkhel dangah American eighth seed Emma Navarro chuan set khatna hloh zet chungin a chipui Peyton Stearns lakah 6-7 (5-7) 7-6 (7-5) 7-5 hnehna a chang hram.
Navarro hi nikum lama WTA Most Improved Player of the Year Award dawngtu kha a ni.