Hockey-in a ngek a hlawh!

Hockey-in a ngek a hlawh!
Upa tawngkauchheh pakhatah chuan ‘Sakhuain a ngek a hlawh’ tih hi an sawi fo thin a; a lo chhuahna nia an sawi pawh – Kan pi leh pute khan sakhaw biakna’na ran an talh khan an sakhaw biak ber hnenah khan an ran talh sa kha pek leh tak tak a awm chuang lo va, an talh laia a ngek ri kha a chan chu a ni mai a, chu chu tehkhinna atana hmangin, thawm chauh hlawh, a tak hmuh tur awm lo leh a sawia sawi chauh, a taka tih awm si lo sawina’n an hmang thin a ni.
Hei chiah hi Mizoram Hockey chungah pawh hian a thleng mek niin a lang!
Hockey game ngainatute leh kan hruaitute pawh hian hman atang tawh khan kan Aizawl khawpui chhung ngeia hockey ground neih hi an lo beisei ve tawh thin a; Mizote fanu chuam Lalremsiami pawh hian a lo sawi fo tawh a; tin, tuna kan ram hruaitute ngei pawh hian hockey game chu duhsak bik leh duat bik a nih tur thu hi an sawi chamchi bawk.
Heti hi ni mah se, vawiin thlengin kan Aizawl khawpui chhungah hian hockey stadium chu sawi loh a ground takngial pawh siam ve tumna leh hmalakna engmah hmuh tur leh hriat tur a la awm lo a nih hi!
Khawvela hockey ram ropui, hmeichhia leh mipa senior leh junior-a world ranking top 10-a tling vek thei, India tana tun dinhmunah ngawt pawh international player pathum lai kan neih theihna game heti taka ngaihthah a nih lai hian tunhnai maia kan thu hriat thar chu maw…
July ni 1, 2025 khan Mizoram volleyball hruaitute chuan kan chief minister an hmuh thu leh chief minister zahawm tak chuan Aizawla Volleyball Indoor Stadium din ngei a duh thu leh sawrkarin ngaihpawimawh bika a neih tur thu a sawite.
Tin, July ni 2-a kan sports minister zahawm takin Dr. Men Sukh Mandaviya, Union Minister for Youth Affairs & Sports nen a chenna ina an inkawmnaah football stadium siam bawk a thlen leh thute zuk nia!
Tunah hian Aizawl khawpui chhungah hian volleyball court tha leh zahpuiawm lo tak tak kan nei nual a, chu’ngahte chuan tournament lian leh hlawhtling tak tak pawh buatsaih a ni reng bawk.
Chutiang chu a nih mek lai leh India hi mipaah world ranking No. 55-na leh hmeichhiaah 59-na a nih phak ve hramna game-ah pawh international player pakhat te mah Mizote’na kan neih phak ve lohna hi chutiang tak chuan vei leh ngaihpawimawh bikah kan nei tlat si a nih hi!
Football-ah ngat phei chuan Aizawl khawpui chhung mai bakah khaw hrang hrangahte pawh khelmual tha tak tak kan nei fer fur tawh a; kan minister zingah pawh phul lem phah tam luat avanga chirhtheh leh sel kai hialte pawh an lo awm tawh a nih kha!
Chutiang a nih mek lai chuan football stadium tha lehzual neih belh leh chu tuipui leh buaipui berah kan la nei ta cheu dawn em ni le?!
Tun hnai maia kan hruaitute thusawi, “Mizoram hian infiamna kan buaipui dan hi kan thlak chhoh tan a ngai dawn,” tih thute kha a lo dik teh meuh mai. Kan zavai mai hian infiamna kan buaipui dan hi kan thlak a lo ngai takzet a nih hi.
‘Hockey game chu duat bik leh duhsak bik a ni ang…’ tih thute leh tuna kan hruaitute buaipui leh thil tihte han ngaihtuah hi chuan: ‘Hockey-in a ngek a hlawh’ tih hi a inhmeh ber niin a lang.
– Apektei pa