Hockey jersey rawng thlak buaina kal zel

Hockey jersey rawng thlak buaina kal zel
Infiamna thlura India thuam rawng ni kumkhua chu rawng pawl a ni.
India mipa football team chu ‘The Blue Tigers’ tia koh niin, senior women’s team chu ‘Blue Tigresses’ tih an ni a; Indian men’s national cricket team pawh ‘Men in Blue’ an ti a, an hmeichhe team pawh ‘Women in Blue’ an ti leh mai a.
Indian men’s national field hockey team an koh duatna ni kumkhua pawh ‘Men in Blue’ tih tho niin, hmeichhe team pawh ‘Women in Blue’ an ti fel leh et a, tumahin an sawibuai ngai lo!
Chuti ang bawkin ram hrang hrangin infiamna huangah rawng bik an nei theuh a, politik nen chhum pawlha rawng thlak ta maimai sawi tur an vang khawp mai!
Bharatiya Janata Party (BJP) lalna ni mek India kan danglam leh bik a, tunhnaiah Indian hockey team-te chuan an thuam rawng an thlak thut a, kanhma lawka hockey world cup an khelh hunah pawh rawng pawl bansanin rawng eng leh serthlum rawng inpawlh saffron jersey an ha dawn ta mai a, sawiselna thawm pawh a ring zui ta hle a ni.
Saffron hi hindu nationalism chhinchhiahna a nih bakah BJP rawng (political color) a ni nghal a, hei vang hian hockey team jersey atana saffron hman a ni ta mai hian Hockey India chhungah ngei ngei pawh inhnialna a thlen mek a; political party hrang hrangin BJP beihna’n an hmang bawk a; congress hruaitu langsar Pryanka Gandhi Vadra pawh politician zinga he thila ‘aw’ chhuah langsar zingah a tel.
Hockey India president Dilip Tirkey chuan Indian team jersey rawng thlak chungchangah hian emergency board meeting a ko hial a; a hmaa inthawt lawk pawh awm lo leh executive board takngial pawh rawn an ni lo chu an hriatthiam loh chhan a nih thu a sawi a; executive director RK Srivastava hnena jersey thlak thutna kawnga document awmte tarchhuak tura hun a bituksak chu chhan a ni lo!
Secretary General pawhin he thil avang hian a hranin emergency executive board meeting a ko ve tawh bawk.
Jersey rawng thlak dodaltu langsarte zingah India captain lo ni tawhte an tel deuh vek a tih theih a; player hluite pawhin an duh loh thu an auchhuahpui tawh a; jersey change chungchanga inrawnkhawmna awm lo leh India team nihna (identity) thlenga a thlakdanglam tur chu an duh loh chhan lian a ni.
Hockey India president berin sawilawk pawh awm lo leh inrawnkhawmna pawh awm lo tia a sawisel laiin secretary Bhola Nath Singh chuan jersey thlak chhan sawifiahin, technical decision a nih thu te, official lamin an hriat vek thu leh player lamin rawng thlak an phut vanga thutlukna siam an nih thu a sawi ve thung.
Captain leh player hluite bakah Indian hockey chawinun lehna kawnga thawhhlawk tak, Indian hockey team sponsor ni bawk Odisha sawrkar pawhin he thutlukna hi na takin an sawisel a; eng vanga jersey rawng thlak duhna lo piang ta thut nge tih leh team nihphung (identity) kum kha lehchen an lo vawnnun tawhah nghawng tha lo a neih turte chu an dodal chhan a ni.
Tun August ni 15 atang hian Netherlands leh Belgium ramte inthlentawm tur Hockey World Cup khelh tan a ni dawn a, he huna Indian hockey team hak tur jersey thar duanchhuah thu chu July ni 27 khan puan thut niin, sawisel a hlawh hle a, dodaltu player hlui zingah Vasudevan Bhaskaran, Viren Rasquinha, Ajit Pal Singh leh Pargat Singh-te chu a langsar zingah an tel.
He thil hi politik thilah pawh lakluh nghal a ni a; political debate lian tak hringchhuak nghalin, Odisha chief minister hlui Naveen Patnaik chuan Indian hockey team jersey rawng thlak chu na taka sawiselin, ‘jersey pawl chu India tan a ni a, jersey eng chu Brazil ta a ni’ tiin a aupui.
Patnaik hian sawi zawmin, “Blue hi kan national flag blue chakra atanga lakchhuah niin, kan ram kan chhuanna leh kan nihna pholangtu symbol a ni a; he colour blue hi Indian zawng zawngte ta a ni,” a ti.