Mizoram nge, Party pakhat?

Tun hnaia Govt. Mizoram Law College Freshers Social & Felicitation huna Chief Minister Pu Lalduhoma thusawi chuan nghawng duhawm lo tak a nei zui a. Mizoram PCC thalaite chuan chief minister thlalak chei danglamin pawnfen an fentir a, chu chu khawlaiah hung chhuak in, thuziak “Mizoram Chief Minister chuan Pawnfen a fen a lo ngai ta..” tih a chuang a.
State danga indiriam nana ‘lim’ inhalsak te pawh Mizoramah hmuh tur a awm ta zel mai a, tunah thlalak hmanga indiriamna hmuh tur a awm leh a. Duh lohna leh lungawilohna lantir dan hi kan duhtui lo sawt ta hle niin a lang a, kan inngaihtuah chian deuh chu a tul niin a lang.
Chief Minister hian dan lam zirmite hmaah thu a sawi a, law student-te hmaa sawi atan a inhmeh tur nia a hriat ILP te, Mizoram leh India sawrkar MoU te, Sixth Schedule chungchangte a thlang chhuak niin a lang a, inbuatsaihna tha tak a ni kan tihsak thei ang.
Amaherawh chu, educational institution hnuaia zirlaite hnena sawi chhuah awm chi leh political platform-a sawi chhuah awm chi a thliar hrang lutuk lo erawh, a tih atana inhmeh lo, tiin a sawi theih bawk awm e.
ILP tobul a sawi te kha zirlaite tan chuan thu bengvarthlak (informative) a ni a. Chutih rualin, ILP chungchang a sawi duh dan erawh, hnam dangten an lo hriat ve atana duhawm lo tak tak te pawh a tel a tih theih bawk ang. “ILP hi kan nei alawm tia a pawng apuia hnamdang lo lut tur lo restraint vak vak tur a ni lo, kan hman dan hi a reasonable loh chuan court-ah min khing thei, court-a min khin chuan min paih sak daih thei…dim tea hmang tur kan ni…..” tih vel kha chu a duh a nih chuan, a kaihhnawih official-te hnena sawi awm tak a ni zawk maithei e.
Tun hnaia khualzin lo pung chho ta hi a lawmawm rualin, min hmu duhtute an nih avanga ILP tihawlsamna lam lo ngaihtuah kha a tul viau em tih te pawh sawiho theih tak a ni awm e. Harsa taka luh ngai kan nihnate hi kan inhung bikna tinghettu tur a ni a, harsa taka lo lut theite tan pawh a hlu zual bikin a rinawm. Kha leh chen kha khualzin nei mang lovin kan awm a, tunah kan han nei ve ta cheng a, lo sah huk kher kha a tul ber em? Kan chantawk chu a awm ve zel ang chu maw le!
Thil pakhat, ‘consult’ tih leh ‘consent’ tih chungchang pawh kha, inhnialna titawp turin a dik zawk hi chiang fek fawka mipuiin kan hriat a pawimawh khawp mai. “Ruling hrilhfiah dan leh opposition hrilhfiah dan a inang lo tlat zel, a sual thlak…” ti mai lovin, a dik zawk hriat hi mipui right a ni.
Mizo mipuiten Remna kan hlut em em, “Mizoram leh India inremna a ni lo, Mizorama party pakhat leh home ministry inremna a ni, a ropui teh chiam lem lo” tia chief minister-in zirlaite zinga a sawi mai kha! Mizoram party pakhat leh India sawrkar inremna ni si, a hnuah engkim Mizoram hminga a kal leh vek si lai tak hi sawi fiah deuh chu a tul ta niin a lang. MoU ziahnaah khan Mizoram sawrkar hnuaia Chief Secretary khan a hming a ziak bawk a, kha khan eng nge a entir ve tak ang le?
Eng pawh ni se, ram hruaituten remna chungchang an sawi dan inang lo zung mai hi mipui tan a luhai thlak (confusing) lutuk a, hetiang teh nuaiha state pakhat ve riang ruang awm reng hi a dik lo. Mizoram leh India sawrkar inremna nge? Party pakhat leh India sawrkar inremna? tih hi tihchian tul ta chu a ni.