Hollywood lamah Cristiano Ronaldo a lut dawn e!

A football khawvel hun hmawr lam a ni ve tawh a, chutiang karah chuan Cristiano Ronaldo chu lemchan lamah a hmel kan hmu dawn a, British football chanchin tarlanna television drama-ah executive producer a nih dawn bakah amah ngei pawh a chang ve nghal dawn.
Manchester United leh Real Madrid-ah te a vanglai hun hmangin, tunah chuan Saudi Pro League lama Al-Nassr tan a khel ta a, an ram, Portugal tana player pawimawh ber a la ni zel bawk. Ronaldo hi TV series ‘Day 1s’-ah a inlan dawn a, Premier League lama Arsenal thiampuipa lo ni tawh thin Thierry Henry pawh a inlan dawn e. He project hi Cristiano Ronaldo tan television drama lian thama a vawi khat inlanna tur a ni a, football lama a hlawhtlinna pian lamah lemchan khawvelah hian eng nge a an kan la hmu dawn e.
‘Day 1s’ TV series-ah hian football agent thil tithei tak mai chanchin behchhana British football khawvel thlirna tarlan a ni dawn a. Ronaldo chuan he project chungchang hi sawiin, a football career piahlamah atana mellung thar tur niin a sawi a, “Ka tan bung thar phurawm tak a ni dawn e,” a ti.
He series hi UR•Marv Studios produce tur a ni a, he production company hi film siamtu Matthew Vaughn leh Cristiano Ronaldo ten nikum April thlaa an din a ni a, Matthew Vaughn hi ‘Kingsman’ leh ‘Kick-Ass’ franchise te pawh lo direct tawh, lemchan khawvela tawnhriat nei tha tak a ni.
Independent film studio UR•Marv an din tirh ian Matthew Vaughn chuan film leh television production danglam deuh hlek buaipui an tum thu a lo puang tawh a, ESPN-in an kawmnaah Vaughn chuan, “Cristiano hian pitch lamah thawnthu ropui tak keiin ka phuah thiam hauh loh tur a nei tawh a, ani nen hian movie awmze nei siam dun theih hun pawh ka nghakhlel tawh hle a ni,” a lo ti tawh bawk a ni.
He TV series-ah hian France leh Arsenal striker thin Thierry Henry pawh a inlan dawn a, anni pahnih hi Premier League lamah lo inhmachhawn tawh thin niin, he league-ah hian a tunge player ropui ni zawk tihah te pawh inhnialna lo awm ve tawh thin kha an ni a, tunah chuan football pitch pawnlamah an thawk dun dawn ta a ni.
London chhuak The Sun chancinbuin a tarlan danin ‘Day 1s’ filming hi London hmarthlang lama Barnet FC stadium-ah an tan tawh a, he series-ah hian British actor Damian Lewis, rapper Dave leh Carlotta Banat te pawh an inlan ang.
A thawnthu hi footballer tak tak behchhan a ni dawn lo va, football agent thil tithei tak anga an din chawp, Stanley Dalton chanchin virvel a ni deuh ber dawn a, Dalton lemah hian Homeland leh Billions star Damian Lewis hi a chang dawn a ni.