Hollywood Walk of Fame-a arsi nei thar tur zingah Karol G leh Kate Hudson an tel

Hollywood Walk of Fame-a anmahni puala arsi nei thei tur mi 27 hming an puan thar a, chung zingah chuan music star atangin Karol G, David Guetta, Ramones, Lonkin Park, Grandmaster Flash te paw an tel a, acting lam atanga arsi nei thar turah Kate Hudson, Idris Elba leh Lisa Kudrow te pawh an tel.
Hollywood Walk of Fame-a mahni puala arsi nei hi khawvel huapa lar dan tehna pakhat a tling ve hial a, rimawi bakah lemchan leh infiamna lama lar leh thei chungchuang te pualin arsi hi dah thin a ni a, Hollywood Chamber of Commerce enkawlna hnuaia awm a ni.
Tuna arsi nei thar tur an puan zingah chatuan ram pan tawh pakhat Waylon Jennings a awm a, ani hi music huang atana arsi nei tura thlan niin, he country legend hi 2002 khan a boral tawh a, a thih hma lawk, 2001-ah Country Music Hall of Fame-a lak luh a lo ni tawh bawk.
Kumina arsi nei thei tura an puan Ramones leh Grandmaster Flash te chu Rock & Roll Hall of Fame-ah pawh lak luh an lo ni tawh a, Grandmaster Flash bakah hip-hop lam atangin Lil Wayne leh DJ Charlamagne tha God te pawh arsi nei tura puan zingah an tel. Charlamagne tha God hi Radio category atanga arsi nei tura puan awmchhun a ni bawk.
Arsi nei thei tura puan zinga pariat- Karol G, Guetta, Jennings, Marc Shaiman, Smashing Pumpkins, Linkin Park, Lil Wayne leh Cheech & Chong te chu Grammy dawng tawh an ni.
Kate Hudson pawhin Song Sung Blue avangin kumtir lam khan Oscar nomination a lo nei tawh a, kum 10 kalta khan a nu actress Goldie Hawn leh a pahrawn actor Kurt Russell te pawhin nupa angin arsi hi an lo nei tawh bawk.
Tun tuma hming puan zingah hian Ella Fanning leh Dakota Fanning te chu unau anga arsi nei tur an ni a, Walk of Fame-ah hian unau anga arsi intawm hmasa ber tur an ni.
Rimawi lam atanga kan hmelhriat, Pussycat Dolls hmatheh deuh bera awm thin Nicole Scherzinger pawh live teater/live performance huang atanga arsi nei turin thlan a ni a, ani pawh hian nikum khan Tony Award a lo dawng tawh.
Walk of Fame Selection Committee-in nomination tam tak atangin Walk of Fame-a arsi nei tur hi an thlang thin a, chu chu Hollywood Chamber of Commerce board of directors-in an lo tlifim leh thin a, chumi paltlang, arsi nei thei tura an hming puan te hian kum hnih chhungin an puala arsi hi an siam hman tur a ni a, kum hnih ral hmaa arsi hi an dah hman lo a nih chuan an hun a liam thin a ni.