Home hnuaia hna lakah ex-servicemena tam thei ang luh theihnan inbuatsaih

Home hnuaia hna lakah ex-servicemen
a tam thei ang luh theihnan inbuatsaih
Home department hnuaia hna lak a awm leh hunah ex-servicemen a tam thei ang ber an luh theihnan an inbuatsaih tih Home minister K Sapdanga chuan a sawi.
Sainik Welfare & Resettlement dinhmun bihchiangin Nilaini khan Home minister ho hian thutkhawm a ni a. Sainik Welfare & Resettlement chu a enkawltu ex-servicemen an nih angin, chhawmdawl leh hamthatna an dawnna kawngah theihtawp a chhuahpui zel tur thu a sawi.
Mi invawng, taima leh training tha tak lo nei tawh an nih avangin ram venhim bakah khawtlang tan mi tangkai leh chhawrtlak an ni tih sawiin, sawrkarah pawh lut se rinawm tak leh tha taka thawktu an ni dawn a, Home department hnuaia hna lak a awm leh hunah pawh ex-servicemen a tam thei ang ber an luh theihnan an inbuatsaih thu a sawi a ni.
Tunah hian Mizoramah registered ex-servicemen 6355 leh registered widows (sipai thi nupui/ hmeithai) 2550 an awm. Sainik Welfare & Resttlement hian Aizawl, Lunglei, Champhai leh Kolasib-ah district office an nei a, office atan mimal in luahna district-ah office sak dan ngaihtuah a ni.
Integrated Sainik Rest House/ Complex sak tharna tur leh War Memorial thar din tuma hma lak mek a ni a. State sawrkar hmalakna in ex-servicemen leh an chhungten (dependent) a thlawna computer an zir theihna tur Sainik Computer Training Centre chu kum 2003 atang khan hawn niin, mi 389 an zirchhuak tawh. Ex-servicemen hian Group B (non-gazette) chin post hrang hrangah reservation an nei a. Sawrkarin ex-servicemen tan hmathatna hrang hrang a siam chu dawng an awm nual rualin, documents neih kim loh avanga dawng thei lo an awm thin tih sawi a ni.