Home minister-in Haflong-a Hmar Inpui jubilee lawmna hmanpui

Hmar Inpui, Assam Hills Region din champha vawi 25 (silver jubilee) leh Hmar Students Association (HSA), Day chu Halflong, Assam-ah lawm a ni a, Mizoram a\angin Home minister K Sapdanga hoin an hmanpui.
Home minister chuan, Hmar Inpui tobul leh a chanchin chhui kirin, tawrhna nasa tak kara inpumpekna, nghet taka ding tura huaisenna, hmathlir thui tak, a tak lo chang mekte kan hmu tih a sawi a. Hruaitu hmasaten tumruhna leh huaisenna nen he zinkawng zawhpui a, hnam lung an lo phum chu thangtharte hmaah an chhawp a, thawk chhunzawm tur ngawt ni loin, mawhphur chhunzawm turin min duh tih a sawi.
Silver Jubilee an lawm chu an tum ram an thleng ta tihna a ni lo a, rual ute meichher chhit nun sa chu mit loa chhi chungin, hmabak lam pana thawk chhuak turin a chah a. “Kan tum ram pana kan kal mek laiin, hei erawh theihnghilh lo ila, hmelma siam aiin thian siamin ram a lak zau theih zawk,” a ti.
Hawina lam apiangah hnam dang thenawm an chu, thianah leh lamtangah siamin, chu chu an chakna thuruk tur a ni tih K Sapdanga hian a sawi.
“Ram rorelna hi ep ai chuan, sawrkar chakna hman thiam a remhriat thlak zawk a ni, “ a ti
Jubilee hmanpuitu dang minister Lalnghinglova Hmar chuan zirna lamah theihtawp chhuah tura fuihin, “Hma kan sawn dawn chuan kan mamawh chu thiamna a ni. Thildang ti miah lo mah ila, lehkha kan thiam chuan hma kan sawn ang. Officer kan awm thup chuan tu mahin min hmu hniam ngai lo ang,” a ti.
Mahni awmna hmun theuha lungawi a pawimawh tih sawiin, “Kan ngheh a ngai, kan awmna hmunah nghet ang u. Kan ngheh loh chuan hma a sawn theih loh,” a ti a. Mahni awmna hmun theuh atangin Zohnahthlakte inpawh tlang taka awm zel turin a sawm.
Jubilee hmanpuitu adviser to chief minister (Political) Lalmuanpuia Punte chuan hnam chak leh lian ni turin inpumkhat a pawimawh tih a sawi a. Tuna Haflong an kal chhan pawh jubilee hmanpui tur ngau ngau ni loin, Zohnahthlak awmte inpumkhatna tura hma an lakpuina a ni tih a sawi a. Chumi ang chuam Zohnahthlak hnam hrang hrangte pawh an kawm a, inpawh tawn a, hnam dang laka an tanrual theihna atan hma lak chu an ‘mission’ pakhat a ni tih a sawi.
Hmar Inpui Assam Hills Region kum 25 tlin leh HSA Day lawmnaah hian bialtu MLA, Assam sawrkara cabinet minister Nandita Gorlosa, Manipur MLA Ngursanglur Sanate bakah Manipur, Guwahati, Meghalaya leh Delhi-a Hmar hnam hruaituten an hmanpui a. Mizoram atanga kal sawrkar hotute hi Assam ram chhunga hmar khua hrang hrangin anmahni khuaah lo hmuakin chawimawina thilpek an lo hlan a ni.