Home minister-in Naxal-te inkahhai rawtna a hnawl
Union Home Minister Amit Shah-a chuan Pathianni khan Maoist-ten inkahhai an rawtna chu a hnawlsak a, kal firfiakte hian inpek emaw, an ralthuam tun emaw an duh a nih chuan an pawm em em a, venhim hna thawktute pawhin an kah dawn miah loh thu a sawi thung.
“Tun hnaiah thil chiang lo, inhnial theih thil a lo chhuak a, ziaka darh niin inkahhai puan a ni dawn tih a awm a, a dik lo a ni. I Inkahhai a awm dawn lo tih ka sawi duh a, in pek induh a nih chuan inkahhai puan a tulna a awm lo. In ralthuam in tun phawt chuan in lakah silaimu pakhat pawh sen a ni lo vang,” tiin Shah-a chuan a sawi.
Naxal-te hian inpek an duh a nih chuan red carpet nen lo hmuak tura inpeih a nih bakah ‘chhawmdawlna policy tha tak’ peih sa a nih bawk thu a sawi.
Pathiannia ‘Naxal Mukt Bharat’ seminar kharna a hmanpuinaah Shah chuan left party-te chu Left Wing Extremism ngaihdan an la thlawp avanga demin hmasawnna a awm loh avanga Maoist tharum thawhna thleng anga an sawi chu a dik lo tih a sawi a. An chetna avang zawngin kum tam tak chhung ram chhung hmun hrang hrangah hmasawnna a thleng thei lo zawk tih a sawi.
“Inkahhai hi kan kalpui dawn lo tih ka sawi duh a. Inpek in duh a, ralthuam tun in duh a nih chuan in lakah silaimu pakhat pawh kah a ni lo vang a. Red carpet nen in inpek phawt chuan lo dawngsawng tur cheuvin inpeih reng a ni,” a ti.
Shah-a hianvenhim hna thawktuten Naxal-te nuai chimih tuma Chhattisgarh-Telangana ramria Operation Black Forest leh beihpui hlawhtling tak taka an thlak hnuah CPI thenkhat atangin inkahhai puan rawtna dawn a nih ngei thu a sawi a. Heng beihpui thlaknaah hian hel pawl hruaitu lawk tak tak kah hlum an nih thu a sawi.
Minister chuan Naxal-ten mi tam tak nunna an lak avang ringawt pawhin India atanga Naxalism nuai chimih chu a tul tih a sawi.
India-ah Naxalism a thang mek nia sawi chu a dik loh thu a sawi a, an ngaihdan chu mipuiin an hnawl mek zel zawk tih a sawi.
“Engvangin nge Naxal avanga buaina hi a lo pun, engati nge a thana ram chhunga a awm? Tu nge an ngaihdan hi thlawp tlat? Indian khawtlang hian Naxalism kal dan leh miin an ngaihdan an thlawp a, dan hmanga an tan a, suma an puih chhung chuan Naxalism hi a tawp dawn lo,” a ti a. “Naxal-te ngaihdan zawm leh thlawptute hi kan hriat chhuaha kan tihtawp vek a ngai a ni,” a ti.
Shah-a hian March 31, 2026 atang chuan India chu Naxal-te awm lohna ram a nih tawh tur thu a sawi bawk.