Home minister-in nunna chante ral “Zoramin lu kan sun a, rilru a na”

Cyclone Remal vangin Zoramin lu a sun a, chhungkuaa nunna chan hialte kan awm chu rilru a na in thinlung takin kan tuar tlang niin ka hria, tiin Home minister K Sapdanga chuan a sawi.
Disaster Management & Rehabilitation minister ni bawk K Sapdanga hian hmun hrang hranga Cyclone Remal avanga nunna chante ralin Nilaini khan a kal kual a. State sawrkarin a ruahman angin, ralna hmahruai cheng nuai hnih theuh a hlan.
He chhiatna avanga nunna chante hi cheng nuai 4-in sawrkar chuan a ral dawn a, tunah nuai hnih theuh hlan phawt an ni a, hun remchang hmasa berah ralna thawhnihna hlan leh a ni dawn a ni.
Aizawl Salem Venga nunna chante a ralnaah K Sapdanga chuan, Pu Laltanpuiate chhungkuain vanduaina tawka nunna an chan vek takah chuan, sawrkar lam chuan tu kutah ber nge ralna hi a hlan ang tih an hriat mai loh avangin, khawtlang hruaitu local council leh YMA kuta hlan mai tha an ti a, anni’n a pek tur diktak hnenah lo hlanchhawng mai se, an tih thu a sawi.
Chhiat tawh nikhuaa Zonun zemawi kan lantir thin chu ropui a tih thu sawiin, “Tlawmngai pawlte inpekna leh kohhran leh khawtlang hruaitute bakah mimal tlawmngai chhiat tawkte tanpui tura kan thawk chhuak nghal thin hi a Kristian hlein ka hria a, sawrkar lama a kaihhnawih department-te hmalakna leh thawhrimna a chhuanawmin a thlamuan thlak hle,” Home minister hian a ti.
Home minister minister pahnih Lalnghinglova Hmar leh B Lalchhanzova bakah adviser to CM Lalmuanpuia Punte ten an tawiawm a ni.