Home tana sawrkarin buhfai a pek thin tihpun a ngai dawn – Chief minister

Home tana sawrkarin buhfai
a pek thin tihpun a ngai dawn
– Chief minister
Mizoram hmun hrang hranga home tan state sawrkarin ration buhfai a pek thin chu tunah quintal 6636 a ni a, home-a awm an pun zel avangin hei hi tih pun hial a tul hmel tih chief minister Lalduhoma chuan a sawi.
Pathianni khan chief minister hian Sakawrtuichhuna Tawngtai Bethel Camping Centre (TBCC) a tlawh a, chawhnu inkhawm telpuiin Krismas leh kumthar an lawmna tur cheng nuai 5 a pe. Bialtu MLA, adviser to chief minister TBC Lalvenchhunga’n a tawiawm.
Mizorama home hrang hranga enkawlte tan sawrkar chuan buhfai kg khat Rs.6 anga chhutin thla thum danah quintal 6636 vel a pe thin a. A man a tlawm em avangin tihsan hlek a, mihring pek zat tihpun an rilruk tih Lalduhoma hian a sawi. “Tuna kan pek mek hi mi 14788 tana chhut a ni a. Home-a enkawl hi tlem tial tial se kan duh laiin, an pung tial tial mai si a. Buhfai pek zat hi tihpun a tul hmel,” a ti.
Thuawih hlutzia hrilhin, home enkawltute thu awih turin a chah a. Nun tha lo sim tura buatsaih mek an ni chu anmahnia ‘a rah lo peng’ sahthlakna a ni a. Mahni peng sahthlak chu a na in tawrh har mah se, huai takin ‘a rah lo peng’ hi sat thla turin a fuih.Chhungkua leh khawtlang tana mi tangkai tak tak an ni leh thei tih ringhlel reng reng lo turin a chah bawk.
TBCC-ah hian mi 1270 vel an awm mek a. Chief minister Lalduhoma hian chief minister atana lakluh a nih ni, 2023 December 8 khan an chenna in pan hma in a tlawh tawh a. A kum khat cham, December 8-ah a tlawh leh a ni.