Hospital pantu thihnaah nuai 43 pe tura tih an ni

Naute leh a nu thihnaah damdawi in khar tawh, New Life Hospital chu cheng nuai 43 chuang chawi turin an chungchang reltuten an ti. Hetihlai hian he hospital hian an fimkhur loh vang lam a ni lo tiin court sang zawka zualko an tum.
2016 November 12 khan J Zosangzuali w/o Lalduhawma chu New Life Hospital-ah nau nei turin dahluh a ni a, nau veina pek a nih hnu darkar 8 a liamah pawh naute a neih mai theih loh avangin zan dar 9 velah tih tawp a ni. A tuk March 13 zing dar 6.30 ah nau veina pek leh a ni a, pek a nih atanga darkar khat vel pelh hnu ah ICU-a dahluh ngai khawpin a awm a, ICU-a dah luh a nih hnu hian naute (hmeichhia) thi sa in a hring a, amah pawh hi hemi ni tlai dar 4.30 ah a thi zui ta a ni.
J Zosangzuali leh a nau pai lai thihna avanga lungawi loin New Life Hospital-in an enkawl danah hian ‘medical negligence’ awma a hria in a pasal Lalduhawma leh an fapa Malsawmzuala Tlau te chuan Mizoram State Consumer Dispute Redressal Commission-ah complaint an thehlut a, Rs. 98,45,440 chawi turin New Life Hospital hi an phut a ni.
Hun rei tak case hi ngaihtuah a ni a, doctor hrang hrangte pawh thuhretu atan koh an ni a, thutlukna siamin New Life Hospital chu medical negligence chungchangah thiam loh chantirin Rs. 43,48,480 chawi turin Commission hian a ti a. An sum chawi tur hi ni 90 chhungin State Commission-ah deposit (pe) turin a hriattir bawk.
New Life Hospital aiawhte chuan vanduaina thleng ta chungchangah hian damdawi in thawktute chuan theihtawp an chhuah a, amniotic fluid embolism a ni a, chu chu ven ngaihna awm lo a nih avangin medical negligence-ah an ngai loa, National Consumer Court-ah appeal an tum tih an sawi a ni.