Hot 100 top 5-ah Kendrick Lamar hla hlang a lang

Hot 100 top 5-ah Kendrick Lamar hla hlang a lang
Billboard Hot 100 (singles) chart top 5-ah rapper Kendrick Lamar hla vek a lang a, hetiang thei hi Taylor Swift, Drake leh The Beatles chiah an la awm a, Lamar hi a palina a ni. Tunkar chart top 5-a Lamar hla lang te hi a album thar ‘GNX’ a hlate vek an ni a, he album-a hla dang pahnih chu top 10-ah lang bawkin, tihian tunkar chart top 10-a hla pasarih chu Lamar hla, ‘GNX’ album ami vek niin, he album hi Billboard 200 (albums) chart No.1 a ni nghe nghe.
Kendrick Lamar hla ‘Squabble Up’ chu chart No.1-ah a debut a, Lamar hla he chart-a No.1 kai thei pangana niin, kumina a hla No.1 thei pathumna a ni bawk a, kuminah chuan he chart-a No.1 kai thei hla ngah ber a la ni. Lamar hian May thla khan a hla ‘Not Like Us’ chu kar hnih a lo No.1 pui tawh a, April thlaak Future leh Metro Boomin a tawhpuina ‘Like That’ chu kar thum a No.1 tawh bawk a, record siamin mipa solo singer zinga kum khat chhunga he chart-a No.1 a debut thei hla pathum nei hmasa ber a ni a, mipa solo singer ni lo zingah pawh hetiang tithei hi BTS(2021) leh Ariana Grande (2020) te chiah an la awm.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian kar khat chhunga all genre U.S. streaming (official audio leh official video), radio airplay leh sales data te chu tehna pawimawh a ni.
‘Squabble Up’ hi stream maktaduai 52, radio airplay maktaduai 5.7 leh sales 5,000 tlingin No.1-ah a debut a, a hla dang ‘TV Off’ featuring Lefty Gunplay chu stream maktaduai 46.9 tlingin No.2-ah a debut a, SZA a thawhpuina ‘Luther’ chu stream maktaduai 44.4 kaiin No.3 a ni a, ‘Wacced Out Murals’ chu stream maktaduai 38 tlingin No.4 a ni a, ‘Hey Now’ featuring Dody6 chu stream maktaduai 31.2 tlingin No.5 a ni bawk.
He chart-a kar 19 No.1 a, chart No.1 ni rei record nihtrualtu Shaboozey ‘A Bar Song (Tipsy)’ chu No.1 atangin No.6-ah a tawlh ta a. He chart an tihchhuah tawh kum 66 chhunga midang zaipui lova he chart-a No.1 ni rei ber a ni a, No.1 nih reiah 2019-a Lil Nas X ‘Old Town Road’ featuring Billy Ray Cyrus record a rawn nih rual ta bawk a ni. Lady Gaga leh Bruno Mars ‘Die With a Smile’ chu No.2 atangin No.7-ah a tawlh ta bawk.
Kendrick Lamar hla dang, GNX album ami tho ‘Reincarnated’ chu No.8-ah a debut a, ‘Man at the Garden’ chu No.9-ah a debut bawk a, tihian Lamar hian Hot 100 chart top 10-a lang thei hla 22 a nei tling ta a ni.
Chart top 10 khartu chu Mariah Carey Krismas hla chuai thei lo ‘All I Want for Christmas Is You’ chu stream maktaduai 26.8, radio airplay maktaduai 15.7 leh sales 2,000 tlingin, No.16 atangin No.10 a kai leh ta a. He hla hi 1994-a a tlangzarh tawh kha niin, Hot 100 chart top 10-ah hian a vawi khat nan 2017 khan lang ve chauhin, 2019-ah a kar thum a No.1 a, 2020-ah kar hnih No.1-in, 2021-ah kar thum, 2022-ah kar li leh 2023-ah kar hnih No.1 tawhin, chart-ah hian kar 14 a No.1 tling tawh a ni.