Mizoram hmun hrang hranga hotel, restaurant, club, homestay, recreation centre, picnic spot leh a dangtea zu, beer leh wine lei tur awm thin chu zu khapna dan tharin a khap thil a nih avangin dap hna ngawrh taka thawh a ni dawn tih Excise & Narcotics department chuan an sawi. Excise & Narcotics Department hian Zirtawpni khan department hmalakna an thlirlet a. Commissioner Z. Lalhmangaiha’n kaihhruaiin senior officer-te bakah district hrang hranga assistant commissioner-te an tel.
Tunhnaia Mizoram sawrkarin The Mizoram Liquor Prohibition Act 2025 a pawm, Mizoram gazette-a kumin March 20-a sawrkar hriattirna hmanga tihchhuah taka hmalak dan tur sawiho a ni a. Zu khapna danpui – MLP Amendment Act 2025 hnuaia zu khapna hian Mizoram pum a huam tawh a. Tunhmaa he danin a huam loh District Council pathum – Mara, Lai leh Chakma Autonomous District Council chhungah pawh he dan hi khauh taka kenkawh a ni tawh dawn tih sawi a ni.
Mizoram sawrkarin wine siam phalna a pek pathum – Hnahlan Winery, Tlangsam Winery leh BCH Winery atang chauha siam chhuah wine zawrh phal a ni. Hemi ni lo wine emaw alcohol emaw tel in tur dang siam reng reng chu MLP Amendment Act 2025-in a khap avangin man theih vek an ni a, dan bawhchhetute pawh na taka hrem theih an ni tih sawi a ni bawk.
Tunlaia Mizoram hmun hrang hranga hotel, restaurant, club, homestay, recreation centre, picnic spot adt. a zu, wine leh beer in tur leh lei tur awm pawh MLP Amendment Act 2025-in a khap avangin man theih vek an ni a, dan bawhchhetute pawh na taka hrem theih an ni, tiin, hetianga dan bawhchhiatna dapchhuah hna pawh ngawrh taka kalpui mek a ni tih sawi a ni.
Hengte avang hian sawrkarin a phal loh thil laka inthiarfihlim tur leh MLP (Amendment) Act 2025 bawhchhe lo turin Excise & Narcotics Department chuan mipui a ngen a ni.
Hotel leh restaurant-a zu lam chi lei tur awm thin dap dawn
Get real time updates directly on you device, subscribe now.
Prev Post