Vitamin D chungchanga hriattur pawimawh

Vitamin D chungchanga hriattur pawimawh
Vitamin D hi kan ruh hrisel nan a pawimawh a, chuvangin mithenkhat ni lum aina hun nei lo leh, pawna chhuak vak hman lem lo te chuan an ruh tan leh taksa tana pawimawh tiin vitamin D supplement te an ei thin. Hetihrual hian kan taksaah vitamin D a tam lutuk ang tih a hlauhawm tih hi hriat tel a tha a, chutiang chu hypervitaminosis D an ti. Hetiang thlentu langsar ber chu a supplement ei nasat lutuk vang a ni thin a, hei bakah hian lung (heart) damdawi thenkhat, antacid therapy ei rei lutuk te leh oestrogen therapy te pawhin hypervitaminosis D hi a thlen ve thei bawk. Tun tumah hian Vitamin D chungchang a dietitian leh nutritionist Dt. Sheenu Sanjeev thu leh hla kan rawn tarlang e.
Nikhatah vitamin D 600 IU vel kan mamawh a, chu chu ni ênga minute 15 vel kan awm hian kan taksain vitamin D a mamawh ang a lo siam hman. Mahse, in chhunga awm reng, kan nih emaw, pawn chhuah apianga sun protection hmang nasa lutuk emaw kan nih chuan kan taksain ama tawkin vitamin D chu kan mamawh khawp a siam thei ta lo va, chuvangin supplement kan mamawh ta thin.
Vitamin D kan mamawh aia tam kan ei chuan kan taksaah calcium a lo tam a, chu chu hypercalcemia an ti a, chu chuan taksa peng hrang hrang a tha lo zawngin a nghawng thei a, ruh, kal, lung leh tissue dang te pawh a nghawng thei. Lung leh kal natna kan nei emaw, diuretics heng thiazide te hi kan ei tel bawk a nih chuan hypervitaminosis D risk hi a tisang ve leh thin.
Vitamin D supplement kan ei a nih chuan a khat tawka vitamin D level in-check fo tur a ni a, a nih tur aia a lo tam hret a nih chuan a dose tihhniam emaw, ei loh rih lawk emaw te pawh a tha.
Ni eng hnuaiah kan awm tam thei lo a nih pawhin kan chaw ei atanga vitamin D lakluh tam tum hi a tha hle. Nghapui thau, cheese, sangha thau a bikin tuna leh salmon, pa (mushroom), bawnghnute leh dhoi te pawh hi vitamin D kan hmuh theihna tha tak an ni.
Kan taksain a mamawh tawk vitamin D kan hmuh loh chuan rihna a lo tlahniam a, kan chauin kan zawi a, chaw ei a tui lo a, tuihal deuh huam huam, zun chhuak deuh sek, dehydration leh ek khal te pawh a awm thei a, vitamin D kan taksa a tam viau chuan tihrawl chak lo, BP sang, lung phut dan mumal lo te pawh a awm thei a, a rei hnuah phei chuan kala lungte awm a siam thei a, kal a tichhe thei bawk a, ruh a lo chak lo a, calcification of arteries te pawh a thlen thei.
Vitamin D kan hmuh theihna awlsam ber chu ni lum ai hi a ni a, a bik takin zingkara minute 15 vel ni lum ai hian kan nikhat vitamin D mamawh chu kan hmu mai thin a ni.