House-in MLA thi ta pahnih sun

House-in MLA thi ta pahnih sun
Mizoram Legislative Assembly 9-na thutkhawm vawi 6-na Nilainia neihah Member of Legislative Assembly pahnih chatuan ram pan ta te sun an ni.
Assembly speaker Lalbiakzama sawmna angin House leader Lalduhoma chuan an chanchin a sawi a. Minister hlui ST Rualyapa, Khatla – kumin February 14 tlai dar 6.10 a kum 91 mi nia a thi a ni a. 1935 March 15-ah Chhiahlinga leh Nutiali te fa pasarih zinga a naupang ber niin Vawmbuk khua Lawngtlai district-ah a piang a. 1962 ah Thansiami nen innei fa pali an nei. Zirna lamah Intermediate of Arts a zo a, sawrkar hna a thawk zui a, zirtirtu bakah LDA leh UDC hna a thawk. 1975 atangin politics ah inhmang tanin, Congress party zawmin nihna hrang hrang a chelh a, 1993 MLA inthlanpuiah Congress ticket-in Sangau bial atangin thlan tlin a ni a, minister of state-ah dah niin, LAD leh Land Revenue & Settlement a enkawl a ni.
MLA hlui KL Rochama – kumin February 8 zing dar 1.00 ah kum 88 mi niin a thi, Tuikhuahtlanga cheng an ni. Thanchhinga leh Thanchhingi te fa panga zinga a naupang ber a ni a, 1937 September 11-ah Lunglei Zotlangah a piang. 1975 ah Zodinpuii nen an innei a, zirna lamah Bachelor of Arts a pass hnu ah PU Science a zo a, Bachelor of Divinity a zir zo bawk. Sub Hqrs. YMA Lunglei founder president a ni.
Kum 1971 ah Mizo Union a zawm a, MU leh Congress inchunfin hnu ah 1972 ah 1st Mizoram Legislative Assembly ah Lunglei bial atangin MLA-a thlan tlin a ni. Hetih chhung hian Congress party-ah nihna pawimawh tak tak a chelh bakah All India Congress Committee-ah member a ni thin bawk.
Former Legislators Association of Mizoram ah hun rei tak chhung hruaitu a ni.
Speaker remtihna angin leader of opposition Lalchhandama Ralte, BJP Legislature Party aiawhin Dr K Beichhua, Congress Legislature Party aiawhin C Ngunlianchunga leh, speaker remtihna in Dampa bialtu MLA Dr R Lalthangliana ten an chanchin leh uina thu an sawi a ni.