House-in SIHM hman tangkai ran tha a ti

Bung Bangla-a State Institute of Hotel Management building chu a tul anga hman tangkai a nih theihnan State Legislative Assembly chuan chak taka bawhzui tha a ti.
Sak a nih chhan anga State Institute of Hotel Management (SIHM) building hman tangkai a nih loh chungchangah State Assembly-a Public Accounts Committee (PAC) chuan ‘motion’ a pulut a. PAC aiawhin member TBC Lalvenchhunga chuan, “State Institute of Hotel Management building sak zawh tawh, hun rei tak chhung function loa awm hi, tualchhung miten tangkai zawka kan chhawr theihna turin chak taka hma lak ni se. A tul a nih chuan outsource turin emaw GAD hnuaia ‘The Mizoram Government Land Pooling and Management Scheme’ anga a tul anga hman tangkai turin chak taka bawhzui ni rawh se” tih chu a sawizau a ni.
SIHM Bung Bangla hi October 2007-ah sawrkar laipui Ministry of Tourism-in a sakna atana cheng vaibelchhe 10 hmanna tur administrative approval leh financial sanction a pe a, vbch.8 hi building sakna tur niin, vbch.2 hi hmanrua leh bungraw pawimawh leina tura tih a ni.
Kum thum chhunga hotel management degree level course zir theihna tura ruahman niin a zir tur thlan hi National Council for Hotel Management & Catering Technology kutah a awm a; All India Joint Entrance Examination kaltlanga neih tura tih a ni. State-in a zir tur zaa 20 quota a nei anga, state quota-a zir tur thlan hi state kuta dah a ni.
A building – Administrative Block, Girls Hostel leh Boys Hostel sak zawh tawh chu May 2015 khan a satu state PWD-in Tourism department hnenah a hlan a. Kum 2020-a Audit Team-in a endiknaah Tourism department hian planning tha tawk lo leh project management that tawk loh vangin a function lo tih a hriattir a, thawktu – teaching leh non teaching staff lak a awm lo chu an harsatna ber niin a lo hrilh. Joint Site Inspection neih a nih lai pawhin a building hi a hluiin a tlabal tawh hle a, a cheithatna atan sum mamawh belh a ni dawn tih an lo sawi tih sawi a ni bawk.
Tourism department hian building thawmthat bakah a nihna tura a function theihna atan emaw midang kuta hlan lailawk (outsource) turin emaw hma a la thin tih a endiktute hnenah a lo hrilh thin a. Kum 2022-a PAC-in a endik tumin a hmaa la sawilan ngai loh, Shivalaya Construction Company Pvt Ltd chuan kum 2019 atang khan thla tin Rs.50000 chawiin department-in a luah tir tih hriatchhuah a ni a, in luah man atang hian building enkawl emaw a kawng siamthat emaw a awm hriat a nih loh bakah sawrkara sum chhunluh a awm hriat a ni lo tih sawi a ni.
CAG Report-a a lan danin, Tourism department hian SIHM hi a nihna anga function tir tumin thawktu post siam dilna sawrkarah a thehlut a, post siam phalsak an nih hnu ah pawh a function ta chuang lo tih sawi niin, outsource tumna pawh a hlawhtling lo zui zel tih report a ni.
PAC-in a endiknaa department lam lo sawi dan leh PAC-in report leh rawtna a siam ang pawh chu tihhlawhtlin tuma hmalakna tak tak a awm lo zel nia a lan tak avangin tuna rawtna an siam hi an thutlukna a ni ta tih TBC Lalvenchhunga hian a sawi a ni.
Motion putluh hi House member hrang hrangin an sawi zui a, motion thlawpna lam deuh hlir niin, Tourism minister Lalnghinglova Hmar pawhin SIHM a nihna anga function tir tura department-in hma a lo lak tawh dan a sawi bakah sawrkar atanga dilna an hmuh angin kumin June 5 khan Mizo Territorial Army-in an luah lailawk ta tih a sawi a ni.
Hemi hnu hian speaker Lalbiakzama chuan member-te ngaihdan a la a, motion hi thlawp niin, rawtna anga hma lak zui tha an ti a ni