Houthi-ten ballistic missile-in Saudi khawpui kap

Houthi-ten ballistic missile-in Saudi khawpui kap
Iran-in a thlawp, Yeman-a Houthi helho chuan drone leh ballistic missile hmangin Saudi khawpui, Riyadh leh Red Sea kama an energy hmunte an bei tih an sawi.
Saudi thuneitute pawhin Inrinni khan Riyadh kahna ballistic missile lo dangin an kap chhia tih a sawi a, thi leh hliam leh kahna dang an tawng em tih an sawi lo.
Hemi hma lawk hian an khawpuia international airport bul lawka tuialhthei dahkhawlna hmun a khu nasa hle a, thlawhna thlawp pawh a khaihlak phah.
July thla atanga Houthi-ten nasa zawka an beih atanga a vawi khat nan an khawpuiah hian air raid alert tihrik a ni hial.
US state department chuan Middle East-a American awm mekte chu ‘beng chhia thlawhna thlawh thulhtir leh veivahna buaina awm thei laka inbuatsaih turin’ an chah.
“Iranian-ten an puih Houthi hian airport-te telin Saudi Arabia an kap nasa a. Sipaia inepna hi nasa zawka arh hluai thei a ni,” an ti a. American-te chu ‘heng lai vela zin leh kaltlang fimkhur turin’ an chah bawk.
Saudi kaihhruai tangrual thupuangtu chu Riyadh bakah hian Bish, Taif, Farasan leh Yanbu khawpuia ‘civil mite beih tumna nia lang’ thilte chu air defence hmangin an lo dang tih a tar lang.
Online-a thuchhuah a siamah Houthi sipai thupuangtu, Yahya al-Sarea chuan Riyadh leh vaukam, Yanku-a Aramco state oil & gas company hmun beih nan ‘ballistic leh cruise missile leh drone thahnem tak’ an hmang tih a sawi.
Beihna hi ‘hmelma Saudi-ten pawikhawiha’ Houthi-te thunun, Yemeni khawpui, Sanaa beih an tumna chhan letna a nih thu a sawi bawk.
A hmain al-Sarea-a hian kar liam ta chhungin Saudi Arabia-in Yeman hmun hrang vawi 300 vel an kap niin a lo sawi tawh.
Houthi-te hi Yemen-ah hian khawvelin a pawm sorkar, Saudi Arabia pawhin a thlawp nen an indo mek.
Tun hnaiah Saudi Arabia chhunga hmun hrang hrang an lo kap tawh thin a, kar liam taa Yemen-a Saudi indo thlawhna tla pawh an tih nia rin a ni.
Finfiahna chiang chiah la awm lo chunga AFP news agency-in Yemen tual chhunga indo mek sipai chi hnihte atanga thu a dawn a tar lanah Inrinnia Houthi leh Saudi thlawp sorkar sipaite inbeihnaah mi 48 an thi.
Houthi chuan an fighter 31 an chân a, sorkar pawhin an sipai 17 an thi ve bawk tih an saiw niin news agency chuan a sawi.
Zirtawpni khan UN hnuaia International Organization for Migration chuan tun hnaia buaina chhuak thar leh nasa avang hian mi 1,04,796 vel tlanchhia an awm leh tawh niin a tar lang.