Houthi-ten lawng a tihpila thawktute zawng mek zel

Houthi-ten lawng a tihpila thawktute zawng mek zel
Yemen-a Houthi-ten Red Sea-a bungraw phur lawng beia an tihpila thawktu mi parukte chhanchhuah hna chu European lawng sipaiten thawk mekin mi pathum vel an thi tawh tih an sawi.
Liberian flag intarna, Greek enkawl, Eternity C-ah hian thawktu 25 chuangin Thawhtannia lawngleng tenau atanga kah chhuah rocket-propelled grenade-in a fuh hnuah a chhe nasa hle a, a tihkalna khawl zawng zawng a chân niin UK Maritime Trade Operations (UKMTO) agency chuan a sawi.
Thawhlehni pawh khan la beih chhunzawm niin chhanchhuah leh mi zawn hna hi zanah pawh thawh a ni.
Iran-in a thlawp Houthi-te hian Eternity C hian Israel a pan avangin an bei a, thawktu a zat hriat chiah loh chu ‘hmun himah’ an hruai bawk.
Yemen-a US embassy chuan Houthi hian ‘thawktu eng emaw zat an ru bo’ nia sawiin chhuah nghal turin an ti.
Philippines-a thuneitute chuan thawktu zinga 21 chu an ram mi an nih thu an sawi a. Mi dang hi Russian niin beihna avanga hliam na tak tawkin a ke a chân niin an sawi.
Tun hi Houthi-in chawlhkar khat chhunga lawng a tihpil pahnihna a ni a, Pathianni khan missile leh drone hmanga Liberian flag intarna, Greek enkawl tho bungraw phur, Magic Seas an tipil tawh a, he lawng neitu company hian ‘Palestine-a lawngchawlhna luh phal lohna an bawhchhia’ niin an sawi.
Houthi-in Thawhlehnia video an tihchhuahah chuan lawngah hian ralthuam kengte lawn kaiin thil an tipuak a, hei hian a tipil zui ta tih a lang.
Magic Seas-a thawktu 22-te erawh sumdawng lawng dang kalin an chhanchhuak.
November, 2023 atang khan Houthi hian Red Sea leh Gulf of Aden-ah sumdawng lawng 70 vel missile, drone leh lawngleng tenau hmangin an bei tawh a. Lawng pali tipilin pakhat an hreng a, thawktu mi pasarih vel an that.
An pawl hian Gaza-a Israel leh Hamas inbeihnaah Palestinian-te an thlawpna lantir nan hetiang hian an che tih an sawi a. Israel, US leh UK nena inkungkaihna nei lawng chauh an bei niin an insawi a, a dik chiah lo va, ram pathumte hian a chhan let nan Yemen chu thlawhna atangin an kap hlawm tawh bawk.
Nilaini khan Red Sea-a EU lawng sipai, Operation Aspides chuan Eternity C beihna hi an chhang let tih sawiin ‘thawktu paruk chu tuipuiah hmuh an ni’ tih an sawi a. An hotu chuan panga hi Filipino niin Indian pakhat a tel a, mi 19 erawh an chin an hre lo tih AFP news agency a hrilh.
Greece-a maritime security firm Diaplous chuan Nilainia video an tihchhuahah mi pangate hi tuipuiah darkar 24 chuang an lo tang hman niin an sawi a. “Mi dangte hi zan tlai tawh tak thlengin kan zawng dawn.” an ti.
Diaplous hian thi hi pali an awm tawh tih an sawi bawk.