HPC vice chairman leh councillor-te inkawm

HPC vice chairman leh
councillor-te inkawm
High Power Committee Lunglei vice chairman Lawmawma Tochhawng, MLA kaihhruaiin Lunglei Municipal councillor tharte lawmpuina leh inhmelhriatna chu Thawhlehni khan hman a ni.
HPC vice chairman chuan LMC councillor tharte chu a lawmpui tih sawiin, Lunglei tihmasawn tura hmathlir tha tak tak an neihte an tihhlawhtlin ngei theihna’n theihtawp chhuah tura chahin duhsakna a hlan. “Lunglei Municipal Council hi Lunglei tana mellung thar pawimawh tak a nih angin, LMC Board of Councillors hmasa berte in mawhphurna a sang takzet a ni,” a ti.
Mipui tana hnathawhna leh rawngbawlna chu Pathian rawngbawlna pawimawh tak a ni tih hre nawn fo tura chahin, an hma zawn theuha tih tur awmte uluk leh taima taka thawk thin tur leh, mipui hamthatna dah hmasa zel turin a chah.
Ram leh hnam in hmasawnna a neih tawh hrang hrangah politician-te contribution a tam takzet tih Lawmawma Tochhawng hian a sawi a. “Kan ram hruaitu hmasa leh hruaitu mekte hnathawh leh sulhnu hlu tak takte mipuiin kan hlut thiam a tul a ni,” a ti. LMC nena thawhhona tha tak neih theihnan kawng engkima hma lak puiah a sawm bawk.
He hunah hian Lunglei bawrhsap Ramdinliani, SP Rahul Alwal leh official dangte bakah LMC councillor-te, Sub Hqrs YMA Lunglei hruaitute leh MJA member-te an tel a ni.