Hri veite hmun dangah zin chhuak lo vek

Hri veite hmun dangah zin chhuak lo vek
Tun hnaiah Mizoramah Covid-19 hri vei an awm leh zeuh zeuh a, tun hnaia hriatchhuahte hi Mizoram pawna zin chhuak lo, travel history nei lo vek an ni.
Tun hnaiah ni inhnaih tak takah hri vei hriatchhuah thar an awm a, April ni 13-ah mi pahnih hriatchhuah niin, ni 14-ah mi pahnih, ni 16-ah mi pathum hriatchhuah an ni a, an vai hian tun hnaia zin chhuak lo, hmun dang atanga rawn kal ni lo, Mizoram chhunga awm sa vek an ni.
Ni 13-a hriatchhuahte hi mipa leh hmeichhia an ni a, ni 14-a mite pawh mipa leh hmeichhia, ni 16-a mite hi mipa pakhat leh hmeichhia pahnih an ni.
Thu dawn danin, tun hnaia hriatchhuah mi pasarihte hi covid-19 lanchhuahna natna nei, symptom nei vek an ni.
Vanneihthlak takin ngaihtuahawm an awm lo a, kumina hriatchhuahah pakhat chu ZMC-a enkawl niin, mi dang chu ZMC-a enkawl ngai an awm lo tih thu dawn a ni.
Kuminah February ni 28-a result hriatah hri vei hriatchhuah thar pakhat a awm a, chumi hnuah March ni 2-ah mi pahnihin an vei tih hriatchhuah a ni leh.
February ni 28 hma hian hun engemaw chen chu hriatchhuah thar an awm lo a, nikum December ni 12 hnua hri vei an awm leh hmasak ber chu kumin February ni 28 kha niin, March ni 2 hnuah hri vei an awm lo leh char char a, tun thlaah an awm leh ta a ni.
Thuneitu lam chuan chi-aina turah an ngai lo a, Covid hi a la reh lo a, khawvel hmun dangah pawh, Mizoramah pawh, hri vei thar hi chu awm zeuh zeuh tura ngaih a nih thu an sawi.