Hripui leng kara hmangaihna

The Writer’s Club leh Laisuih Zirbing Rûn tangdunin Covid 19 hri len laia thawnthu tawi inziahsiak an buatsaiha a thazual 20 dah khawm, “Hripui leng kara hmangaihna” tih chu Nilaini khan MJA president C Lalrambuatsaiha’n a tlangzarh.
Mihringte hi Pathianin hun inang tlang vek min pe a, kan hman tangkai dan erawh a inang lo hle tih C Lalrambuatsaiha hian a sawi a. Tuna lehkhabu tlangzarh tak pawh Covid len lai, hnathawh theih loh laia hunawl tangkai taka hmangtute vanga lo chhuak a ni a, a hlu hle tih a sawi a ni.
“Thu tha leh ril tak tak pawh ziaka dah a nih loh chuan a hlutna a lang chhuak lo fo a, ziaka dah a nih chuan a chhawrtu tam tak an awm thin avangin, ziak ngeia dah hi intihhmuh zel a tul a. Hetih rual hian, Mizoramah ziakmiten an kut hah man hlawkna an tel tam tawk lo hle a, khawvel hmun dangah chuan lehkhabu pakhat lek pawh an hausakpui a, hetiang hi la tawng pha ve lo mah se, ziak ngeia dah hi intihhmuh zel a tul a ni,” a ti.
The Writer’s Club president Lalhmachhuana Zofa kaihhruai inkhawmah hian he lehkhabu khawrpumtu, publisher ni bawk KC Vanlalruata’n thawnthu tawi inziahsiak result puangin, lawmman a sem nghal a. 1-na VL Muanpuia, 2-na Hmingtea Tlau, 3-na F Lalthazuali an ni. Mi 5 hnenah consolation prize pek a ni bawk.