Hrisel nan khawthim laiin darkar 6 tal mu rawh

Khawthim laia darkar 6 atanga darkar 8 tal mut a tha a, chu chuan min ti lang naupang thei niin mithiam ten an sawi.
Electricity kan neih hma chuan mi an mu hma a, zingah an tho leh hma bawk, chuvang chuan an taksa mamawh tawk mut an hmu thin. Ran te pawhin boruak inthlak hi khaw êng leh thim inthlak dan atangin an hre ve mai a, chutianga an hriat theihna chu an taksaa melatonin in pekchhuak dan a danglam thin vang a ni.
Melatonin chu mut tichhuak tu hormone a ni a, thlasik ni rei loh lai chuan kan taksa a melatonin a lo tam a, chutiangin nipui a lo thawt a, ni a rei hnu chuan kan taksaa melatonin chu a ma tawkin a lo tlem ve leh mai thin. Chu chu siamtuin min siam dan phung a ni. Mahse, electricity kan neih hnu chuan kan in chhungah khawthim tak tak pawh a awm ta lo.
Tunah chuan mi tam zawkin siamtu min siam phung bawhpelhin, zan rei tak tak thleng kan meng a, rei tak tak mu leh mah ila khaw thim laia kan muthilh chhung a rei tak loh avangin mut kham lo kan ni ta tho tho a ni. Chu chuan kan rilru leh ngaihtuahna bakah kan taksa thlengin nghawng a nei ta a ni.
Melatonin chu hormone, kan taksaa pineal gland-in a siam a ni a, khaw ên chhung chuan pineal gland chu hna thawk lovin a awm a, khaw thim hnuah hna thawk tanin, kan taksaah melatonin a tichhuak ta thin a, chu chu kan thisenah a kal ta a ni. Hetianga khawthim hnu chauha che chhuak thin a nih vang hian ‘Dracula of hormones’ te pawh an ti thin nghe nghe a ni.
Zing khua a lo var chuan kan taksaa melatonin chhuak chu a ma tawkin a tawp ve leh mai a, kan taksain a mamawh hormone dang a rawn chhuak ve leh ta thin a ni.
Pineal gland leh melatonin te chu kan taksaa hun vawngtu pawimawh tak a ni a, khaw êng leh thim thlir hrang tu a ni a, kan thluak hnathawh dan pawh hei hian a khawih nasa hle a ni. A nih dan tura nitin hna a thawh theih hi a pawimawh a, mahse, tunah chuan electricity vangin a hnathawh dan phung hi kan tidanglam ta a, chuvangin kan taksa chuan ‘overtime’-in hna a thawh phah ta a, kan taksaa chemical balance tur a tibuai a, kan taksa a lo lang upa hma ta thin niin an sawi.
Kan muthilh hian kan harh lai ang thoin kan taksa leh rilru ten hna an thawk reng tho am chuvang chuan chemical balance a siam a ni, natna kan do theihna a ti chak a, blood sugar level te pawh a nih tur angin a awm tir a, kan hriatna te pawh a tipung thin a ni. Mahse, zana rei tak tak men a, zinga rei tak tak mut leh hian, kan taksaa melatonin te chu an hnathawh tur ang thawk thei lovin kan siam ta a ni.
Hetiang a nih vang hian mithiam te chuan khaw thim lai ngeia darkar 6 atanga darkar 8 tal mut hi hrisel nan a tha, an ti a ni.