Hriselna atan kea kal tam inzirtir

Hriselna atan kea kal tam inzirtir
Health & Family Welfare Department hnuaia Mizoram Health Systems Strengthening Project (MHSSP) chuan thisen sang, zunthlum, cancer, stroke leh lungphuchawl laka inven dan tur leh inenkawl dan tur Mizoram district 6-a khaw 510-ah zirtirna a kalpui mek a. Hemi atan hian village level, district level leh state level-ah “Hriselna atan kein kal thin ang che” (Walk for Health) tih thupui a hmangin kea kal runpui – walkathon a buatsaih thin.
Hemi bul tanna atan hian Mamit district-a khaw 5 – Chungtlang, Rulpuihlim, Tuahzawl, Bawrai, Zawlnuam Leh Damparengpui ah February 15 khan walkathon hi buatsaih tawhin, an vaiin mi 658 an tel.
Health district 6 – Aizawl East, Lunglei, Kolasib, Serchhip, Lawngtlai leh Mamit ah walkathon hi February 15 atanga March 12-ah buatsaih tura ruahman.
Walkathon kharna hi March 21 hian Aizawlah buatsaih tum a ni a. Aizawl veng hrang hrang atangin kea Sipai Lammual pan khawm tur a ni. Hriselna atan kea kal tam pawimawh zia inzirtirnaa mipui pung khawm tam ber record siampui ngei turin MHSSP mi zawng zawng tel turin a sawm a ni.