Hriselnana tui in hun tha
Hriselnana tui in hun tha
Tui hi kan nunna atan a pawimawh, kan taksa a cell awm zawng zawng insiam nan tui a pawimawh a, mihring taksa 60% hi tui a ni. Tui chuan kan ruhchuktuah a tinal a, taksa peng hrang hrangah oxygen a pe kual a, taksa temperature a siamtha a, digestion a pui a, taksa atangin tûr tha lo a paihchhuak a…kan taksa tana tui pawimawhna hi sawizawh sen pawh a ni lo. Chuvangin taksa hriselna atan tui in tam a pawimawh a, nitin tui litre 2 tal in tur a ni. Chutihrualin tui in hun dik hriat tel pawh a pawimawh a, kan in hun a dik chuan a hnathawh tur a thawk chak lehzual dawn niin Times of India health section-in a tarlang a, kan rawn chhuah chhawng e.
1. Zing thawhhlimah: Zing thawh velah thildang ei hmain tui in nghal tur a ni. Hei hian taksa atangin thil tha lo a paihchhuak a, taksa a tichak thar thin. Tuisik pangngai emaw, tui lum emaw pawh a pawi lo, mahse, tui vawt lutuk erawh in loh tur a ni.
2. Chaw ei hmain: Chaw ei hma darkar chanve vela tui in a tha. Chaw ei hmaa tui kan in hian min tipuar a, chaw kan ei hnem lutuk tur a veng ve thei. Chaw ei hma minute 30 vela tui kan in hian kan taste bud a tiharh a, kan pum lining a tihnawng bawk thin. Hetihrual hian chaw ei lai leh chaw eikham hlim chhawnah chuan tui in loh tur a ni ve thung. Chaw ei kham atanga darkar chanve hma chuan tui in loh tur a ni.
3. Riltam laiin: A chang chuan kan ril a tam emaw kan tih hi kan tuihal vang te a lo ni thin. Chuvangin, chaw ei hun hmaa i ril a tam a nih chuan tui in thin ang che, i dehydrate vangin riltam angin i inhria te pawh a ni thei.
4. Exercise lak hma leh lak zawhah: Dehydration pumpelh nan exercise lak hmain tui no 2-3 tal in tur a ni, hei hian taksaah fluid balance a siamtha dawn a ni. Mahse, exercise lak dawn hnaiah chuan tui in tam lutuk loh tur a ni, pumah tui a tam lutuk chuan a chet vel a tinuam lo thei. Exercise lak zawhah pawh tui in ngei ngei tur a ni, hei hian mi a tiharh tharin, kan taksa atanga tuiril chhuak nasa avanga dehydration awm tur te a veng thei.
5. Dam loh laiin: Dam-mawh-hritlan laiin tui in tam tur a ni a, hei hian taksa a tihhnawn mai bakah taksa atangin thil tha lo a paih chhuak a, dam lo rau rau tui in tam na na na chu tui in tam lo aiin an dam leh chak zawk.
6. Chauh/hah laiin: I chauin i hah a, mahse, i chawl hman tak tak bawk si lo a nih chuan tui in rawh. Kan la hre lo mai thei a, chau/zawi te pawh hi dehydration sign a ni ve thei tlat. Tui in hian thluak a tiharh thar ve leh thei a ni.