HSLC exam-a Mizo titha chawimawi Mizo thalai kan nuamsa ta lutuk em – K Sapdanga

Mizo thalaite kan nuamsa ta lutuk nge, zirna lama India ram huapa hna lian chelh pha kan tlem lutuk chu a veiawm takzet tih Home minister K Sapdanga chuan a sawi a. MZP Gen. Hqrs. chuan HSLC Examination 2025 top 10-a Mizo tlingte chu Nilaini khan a chawimawi a. Hmanpuitu Home minister chuan, pawl 10 pass tam tak zingah mahni thiante subject lak emaw nu leh pa chhung leh khatten zir tura an duh ang stream zawm mai thin an awm fo tih sawiin, “Hei hi kan ching lo chho tial tial niin a hriat a, rilru fim tak pua kan zir zawm tur kan thlan thiam a tul,” a ti.
Mizo zingah All India Service (IAS) direct-a tling kan tlem zel chhan hi thalaite kan nuamsa lutuk ta em tih ngaihtuah a awl tih a sawi. IAS hnuhnung ber chu kum 2014 (kum 11 kalta), Indian Police Service hnuhnung ber kum 1995 (kum 30 kalta), Indian Foreign Service hnuhnung ber kum 2005 (kum 20 kalta) ami an ni tih sawiin, “Mizo thalaiten chona sang tak kan hmachhawn mek. A lehpek hi tunge ni dawn, tih Mizo mipuiin kan thlir rawn ta thup a ni ber,” a ti.
UPSC civil service exam result a chhuahin Vaiho zinga tling tam tak chu engineering leh medical degree nei an ni fo thin, tiin, “Mizo nula leh tlangval technical course zirzote, state sawrkar hnuai ringawta lungawina zawng lo turin mipuiin kan lo hmuak dawn che u,” K Sapdanga hian a ti.
Engineering leh medical line-a lutten kaisang chho zel a, a lu ber thleng turin an zir hun chhung bakah sawrkara an luh hnu ah kum 30 vel tal an mamawh tlangpui laiin, IAS tan kum 5/6 velah a lu ber nih theihna kawng a inhawng zui mai thin tih a sawi bawk.
Mizoram sawrkar hnuaia thawk hnamdang direct IAS 8 vel, direct IPS 17 vel an nei mek tih Home minister hian a sawi a. India sawrkarin district administration post luah tura a duh avangin DC leh SP an ni fur a. Chutihlaiin district lam amiten Mizo tawng thiam DC/SP an duh thin si tih sawiin, “Kan comfort zone atanga chhuak a, India ram zau zawk kan dai dar a tul hle. Chumi kan tih duh tak tak hunah sawrkar laipuiin hna hrang hrang a lakah tling kan tam sawt ang,” a ti.
8 HSLC 2025 top 10-a Mizo tling chawimawite hi mipa 13 leh hmeichhia 9 an ni.
8 KD High School, Govt. Mizo HS, CLS Academy, St Joseph HSS., Mt. Carmel School, Greenland HSS, St. Paul’s HSS leh Baptist HSS Serkawn atangin zirlai 22 an ni.
8 Chawimawina thuziak, topper Rs. 10000, 2-na atanga 10-na Rs. 5000 theuh hlan an ni a. Lehkhabu hlan an ni bawk.
8 MZP chuan HSLC top 10-a Mizo tlingte chawimawi hi kum 1995 atangin kumtin a buatsaih thin a. MZP Inter HS Quiz a tel zirlai 5 chu tun tum top-10 ah hian an lang.
8 MZP president H Lalthianghlima chuan MZP-in HSLC top 10-a Mizo tlingte chawimawina a hlan thin chhan hi, Mizo zirlaite inkarah inelna thianghlim a awm theihnan ti an ni tih a sawi a. Sawrkar enkawl school 13-in zirlai pass an nei lo (100% fail) chu an dinhmun enfiah turin sawrkar an ngen tih a sawi.