Daily Newspaper

Inhauh zawha tih loh tur

12

Nupa emaw inngaizawng te emaw inkarah engtik lai pawhin boruak a tha reng thei bik lo a, inhnial leh inhauh, intihthinrim a tihtauh deuh bâr bâr chang a awm ve thin. Chutiang tawk ngai lo nupa emaw inngaizawng emaw an awm a rinawm loh. Relationship lama mithiam te chuan hetianga kan inhniala, kan inhau deuh bap bap thin te hian mi pahnih inkar boruak a pawt nghet zawk hlauh thei niin an sawi tlat.

Kawppui te nena inhauh zeuh zeuh hi inlaichinna atan a hrisel an ti tlat mai. Mahse, a hriselna leh that zawkna tem pha tur chuan inhauh zawh hnuah engtin nge kan awm a, eng nge kan tih thin tih hi a pawimawh ta a ni. Tun tumah hian relationship lama mithiam ten kawppui te nena inhauh zawh hnuah eng nge tih tur, tih leh eng nge tih loh tur tih an sawi te kan rawn tarlang e.

1. Inhauh zawh hnuah intih lungawi tum leh ngei tur a ni a, mahse, lungawi lo pui lungawi anga lan der loh tur. Kawppui te nena inhauh zawha boruak tha siam leh tu nih hi harsa kan ti theuh a, chuvangin tam tak chu lungawi lo pui kha lungawi angin kan lang der thin. Mahse, relationship lama mithiam te chuan hetianga a dera lungawi anga lan hi tha zawk angin a tirah lang mah se, a rei hnuah nghawng tha lo zawk a nei duh niin an sawi. Lungawi lo kha lungawi angin kan lang der a, mahse, kan rilru chhungril a dam tak tak chuang si lo a, tichuan eng emaw boruak a awm leh hlekin, thil hoteah pawh kan alh chhuak phat tawh mai thin.

2. I kawppui nena in inhauh hnuah awlsam taka lungawi nghal turin beisei lo la, nawr chung chung lo la, hmanhmawh suh. I kawppui chu a inbengdaihna tur hun siam sak ang che, tichuan puitling takin, thil engkim awlsam zawkin in chingfel thei ang. Inhauh zawh rual rual a intihlungawi leh nghal theih chu a tha ngawt mai, mahse, chu chu kan thei thin si lo va, chuvang chuan boruak te han nghak dai deuh i la, chumi hnuah boruak tha siam tuma ke pen a fuh ang. A tu emaw zawk kha kan thinchhe viau a nih phei chuan, a inbengdaih hun nghah thiam kha a hlawk khawp ang. Chutiang ni lo va thinrim engphiar laia intihlungawi kan tum chuan, kan beisei anga an lungawi leh mai loh khan min tithinrim ve leh a, chu chuan boruak tha lo zawkah min hnuk lut thei a ni.

3. A dik leh thiam zawk nih tum kher loh tur. Kawppuite nena inhauhin a dik leh thiam zawk nih kan tum ve ve chuan boruak tha a neih theih loh. A chak zawk nih tum tlat te hian boruak a tichhe telh telh thin. Nupa karah a thiam leh thiam lo zawk awm kher a tul lo va, a dik zawk leh dik lo zawk emaw, a chak leh chak lo zawk emaw awm kher a tul lo.

4. In inhauh chhan kha sawi vul chuk a ngai chuang lo. A tira kan inhauh tanna chhan chu engpawh ni se, kan inhauh laiin subject dang dangah kan pakai a, kan kual thui hman viau zel. Kan inhauh zawh tawh hnuah a tira kan inhauhna chhan tak kha kan la sawi fel lo a nih pawhin chu chu ngaihtuah a tul tawh lo, boruak tichhe zualtuah a tang leh mai mai ang. Hriattur pawimawh tak chu hetianga inhauh nikhua hian thil kal tawh sawi chhuah kan ching a, hei hi kan inveng hman lo fo thin a, mahse, kan boruak tichhe zualtu a ni tih erawh hriat reng a tha.

(THE AIZAWL POST – Phuah Pawlh)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy