HSSLC-a top 10-a langte chawimawi

Aizawl West III bialtu MLA VL Zaithanzama chuan kumin HSSLC result chhuaka Mizoram pum huapa top 10 ni phak, a bial chhunga zirlai 4 hnenah lawmpuina atan Thawhlehni khan laptop a hlan.
Kum danga a tih thin angin MLA hian zirlai tithate chawimawina leh lawmpuina hi anmahni inah kalin a hlan a, kuminah hian Aizawl West III huamchhung Maubawk, Bungkawn leh Khatlaah zirlai titha top 10 mi pali an awm a ni.
“Zirna tel loin hlawhtlinna tluantling a neih theih loh a, ram siamthatna’n leh hnam humhalhna kawnga tha ber pakhat pawh zirna a ni. HSSLC leh HSLC hi zirna kawnga kailawn hmasa a ni chauh a, a kawlpui khengthla ang hrima kan chet chuan kan hlawhtling thei lo ang. Thawhrim a ngai a, hrisel a ngai bawk a, kan invawng tur a ni,” VL Zaithanzama hian a ti.
Lehkhathiam tak tak tan hna a vang ngai loa, hna hmuh chu hlawhtlinna a la ni lo bawk, tia sawiin, “Eng ang takin nge hna kan thawh a, chu chu ram mipuiin engti angin nge an chhawr tangkai tih hi kan tehna tur a ni,” a ti.
Aizawl West III biala MLA-in lawmpuina a hlante chu – Lalawmpuii, Maubawk (Arts-ah 2-na), Grace Lalrinpari Hauzel, Khatla (Arts-ah 5-na), Benjamin Lalsawmtlinga, Bungkawn (Arts-ah 5-na), K Vanruatpuia, Bungkawn (Arts-ah 10-na)