Tunhnaia college zirtirtu thenkhat dahngheh leh sawn chungchanga sawrkar hmalak dan chu kalphung mumal leh tha zawk duh vang a ni tih Higher & Technical Education department chuan sawiin, hrethiam turin a hnuaia college-te a ngen.
-- Advertisement --
H&TE secretary R Lalramnghaka chuan thuchhuah a siam a. Mizoram H&TE department chuan a hnuaia sawrkar college hrang hranga thawk assistant professor (contract) 64 dahnghehna (regularization) order 2023 January 27 khan a tichhuak a. Aizawl pawnlama college zirtirtu 14 Aizawl leh hmundanga sawnna order pawh hemi ni vek hian tihchhuah a ni tih a sawi.
Order-a tarlan ang hian, assistant professor dahngheh tharte chu an thawh mekna hmun atangin post ruak awmna college hrang hrangah dahin, khawpui pawna college zirtirtu zinga a nghetsa, hun rei tak tak thawk tawh, Aizawl /mahni khawhmun ngheta awm mamawh tak takte pawh chutiang tur chuan college hrang hrangah sawn an ni a. Assistant professor dahngheh thar zinga Psychology leh Electronics zirtirtute erawh Aizawl pawna college-te ah an thawhna tur department a awm loh avangin dah chhuah an ni ve lo tih a sawi.
‘Sawrkar chuan a ngheta dah hlimte leh a nghetsate awmna inthlak kual hi college zirtirtute service condition khairualna’n pawimawh a tih bakah college tina subject hrang hrang zirtirtute an zirlai neih tam dan azira a theih ang anga insawirem (rationalisation) a tum meknaa rahbi hmasa atana ti a ni bawk,’ tiin, tuna college zirtirtu transfer chungchangah hian college thenkhatah sawnchhuah leh sawnluh inzat chiah lo a awm tih sawrkar chuan a hria a. Hemi siamfel tur hian hma a la chhunzawm mek tih a sawi a ni.