Huai takin zirtirtu semrual tum Eptute beih kan hlau dawn lo – Education minister

Sawrkarin zirtirtu semrual a tum chu huai taka kaltlangpui a tum a, eptute beih hlauh vangin an duap dawn lo tih School Education minister Dr Vanlalthlana chuan a sawi.
Thawhtannia ZPM office-a inkhawmah Education minister chuan an party manifesto-a an dah Education department-a zirtirtu semrual (rationalisation of teacher) chu huai taka kaltlangpui tumin an thawk mek tih a sawi a. Intih huaisen leh hmingthat tum vanga kalpui an ni loa, tu pawh minister se an tih tur a ni tih a sawi.
“Minister-te hi party manifesto tipuitling tura ruat kan ni a, manifesto tihpuitlin hi kan hna a ni. Rationalisation hmangin zirtirtu transfer dan phung fel zawk, thingtlang lama rei tak awm tawh leh khawpuia awm rei tawh sawnchhuah ngai an awm a, hei hian kan zirna hi a siamtha dawn em tih ngaihtuah chungin fimkhur leh dik taka kalpui kan tum,” a ti.
“Ram siamtha tur hian huaisen a ngai a, mi dawihzep tan siamthat theih a ni lo. Sawrkar hmasate a pawng a takin kan sawisel loa, thil tha tam tak min tihsak tawh tih kan sawi thin. Heti chunga sawrkar hmasate engmah ti lo leh chhe tak anga sawichhuak thina min puh fo hi a dik tawk lo. Tha ni a kan hriatah chuan huaisen takin kan kal zel dawn a, chief minister huaisen kan nei a, minister-te pawh kan huaisen lo thei lo. Opposition beih kan hlauh avangin kan duap dawn loa, Mizoram thatna tur kan ngaipawimawh zawk,” a ti.
An vawikhat sawrkarna a ni a, tihdan an thiam tawk loh thil tam tak a awm dawn tih minister hian a sawi. Sawrkar kal tawhten an tih ngam loh thil tha tak tak ti turin ke an pen mek tih a sawi bawk. “Hei ringawt pawh hi kalphung thar pakhat a ni. Sawiselna tam tak kan tawk a, kan insiamthatna tur pawh a awm ang. Thil tha a nih chuan huai taka din tlang kan tum zel dawn,” a ti.