Hudson River-a helicopter tlaah chhungkua thi

Hudson River-a helicopter tlaah chhungkua thi
Hudson River, New York-ah khualzin chhungkua phurtu helicopter a tla a, naupang pathum telin mi paruk an thi tih thuneituten an sawi.
Mi pangate hi Spain atanga zin niin pakhat hi a khalhtu a nih thu New York City Mayor Eric Adams chuan Ningani khan a sawi a. A chuangte an thi vak tih a sawi
New York Police Commissioner Jessica Tisch chuan thite hi tute nge an nih la puan a ni lo va, an chhungte pawh hrilh an la ni lo tih a sawi a. An chetsual chhan hi chhui mek a ni bawk.
Video thehdarhah chuan helicopter hi van sang atangin a letlingin Hudson River-ah a tla tih a lang.
Thuneitute chuan helicopter hian George Washington Bridge a thlawh pelh hnu lawk, New Jersey vaukam a pan laiin a inthununna a hloh ta niin a sawi.
Helicopter hi New York Helicopters enkawl niin Manhattan chuan hnuai lama Downtown Skyport atanga chawhnu dar 02:59 (India-a Zirtawpni zing dar 12:29)-a thlawk chhuak a ni.
A tlak thu hi tlai dar 03:17 (India-a Zirtawpni zing dar 01:47)-ah hriat niin rescue boat hmanga pan nghal a ni tih New York Fire Commissioner Robert Tucker chuan a sawi.
“Tuihleuhtuten tuiah hian an zawng nghal bawk,” a ti.
Chhanchhuah hna thawktute hian tuiah hian dama lak chhuah theih an awm em tih an zawng nghal a; mahse, an hlawhtling lo.
An zinga pali chu a hmunah hian an thi tih puan nghal a ni a, pahnih chu a bul hnaia damdawi ina lak an nih hnuah an thi tih thuneituten an sawi.
An tlakna lai hi Manhattan khawthlang lam bul, dawr leh zanriah kilna hmun lar a ni a. New York University campus bul lawk a ni bawk.
Federal Aviation Administration (FAA) chuan a chung vir pahnih nei chi Bell 206 tla hi a chhui hna chu National Transportation Safety Board-in an thawk dawn tih an sawi.
Bell 206 hi khawthlir nan te, television new station leh police department ten an hmang nasa hle.
Tun hi New York City-a khualzin phur helicopter a tlak vawi khatna a ni lo va. Kum 2018 khan East River-ah tlain a chuang mi panga leh a khalhtu an thi.
Kum 2009 khan Italian khualzin phur chu mi mal thlawhna nen Hudson River chungah insuin mi pakua an lo thi tawh bawk.