Hasina-i manna tur thupek chhuah belh leh

Hasina-i manna tur thupek chhuah belh leh
Bangladeshi court chuan prime minister atanga an paih thlak tak, Sheikh Hasina, a fanu Saima Wajed Putul-i leh mi dang 17 chu mi dang hminga chenna in neia puhna avangin manna tur thupek a chhuah a, an tih dan hi pawikhawihna a tling tih an sawi.
Ningani khan Dhaka Metropolitan Senior Special Judge Zakir Hossain Galib chuan Anti-Corruption Commission (ACC)-in charge sheet an thehluh chu a pawm a ni.
An mi puhte hi an chin hriat loh a nih avangin manna tur thupek a chhuah nghal.
Statutory graft agency-a prosecutor Mir Ahammed Salam chuan judge hian Dhaka dai, Purbachal-a sorkar enkawl, Rajdhani Unyan Kartripakkha (RAJUK)-a ram lo neite a chhuina hi May 4-ah thehlut turin ACC hi a ti niin a sawi.
ACC hian January 12 khan prime minister hlui lakah leh thuneitu dang, sorkar mi pawimawh tak tak lakah thubuai a thehlut.
Charge sheet-ah hian Putul-i hian a nu prime minister a nih lai khan RAJUK-a ram hi a neih theih nan ti turin a lo hmun a, hei dan leh kalphung bawhchhiatna a nih thu tar lan a ni.
ACC chuan Putul-i leh a chhungte dang hian RAJUK-ah hian in emaw, flat emaw, ram emaw an nei ngei tih an tar lang bawk.
Putul-i hi November 1, 2023 atang khan World Health Organisation (WHO) hnuaia New Delhi-a hmunpui nei, South East Asian regional director ni mek a ni.
Bangladesh-a International Crimes Tribunal chuan a hmain Hasina-i leh politics-a a thawhpui bakah a sorkar leh sipaia hotu lian tak takte chu an mihringpuite chunga dik lo man theihna thupek pahnih a lo chhuah tawh.
Ningania manna thupek chhuah leh a nih hma chiah pawh khan ACC chuan Hasinia-i a nau Sheikh Rehana leh sorkar hotu lian thin pakhatin ‘Mujib Centenary’ lawm nana Taka vaibelchhe 4,000 an hman dan dik lo tak a chhui thar bawk.
ACC chuan he thil hi January atang khan a lo chhui tan tawh a. “Kan team-in pawl hrang hrang atangin thu kan la khawm mek,” an ti.
Bangladesh hian kum 2020 khan an ram dintu, Bangabandhu Sheikh Mujibur Rahman-a pian cham kum 100-na chu kum khat chhung an lawm a, hei hi Hasina-i kaihhruai Awami League-in thuneihna an chan lai a ni.
Rehana-i hi sorkar paih thlak takah khan eng nihna mah a nei lo va, ACC-in an chhui dang hi Kamal Abdul Naser Chowdhury niin sorkara principal secretary thin niin sorkar hna atanga a chawlh hnuah centenary lawmnaah khan chief coordinator a ni.
Hasina-i hi a hlawma mi that leh a mihringpuite chunga dik lo taka chea puhna tam tak a nei bawk a, Bangladesh-a International Crimes Tribunal chuan hengte pawh hi a ngaihtuah mek hlawm.
Kum 16 chhung Awami League-in sorkarna an chan kha zirlaiten lungawi lohna bul an tan atangin nikum August 5 khan paih thlak a ni a. Hemi rual hian kum 77 mi, Hasina-i hi a rukin India-ah a tlanchhe zui ta a ni.
Bangladesh-a sorkar lailawk ding mek chuan hruai haw a dil a, New Delhi erawh chuan a chhang rih lo thung.