Hulhliap chhuakten thiamthil zir

Hulhliap Short Stay Centre-a ruihhlo avanga enkawl ngaia lut, hun tluan hmang zo hnena sawrkarin an eizawnna atana kutthemthiam thil an zirtirna, a batch 3-na chu Mission Foundation Movement Skill Training Centre-ah Nilaini atang khan a thlawna zirtir tan a ani. Tun tumah hian Hulhliap SSC chhuak mi 16-in assistant electrician an zir dawn a ni.
Mizoram Youth Commission chairman, Core Committee on Hulhliap-SSC chairman ni bawk Malsawmzuala Ralte bakah Task Group on Aftercare, Skill Training & Handholding member Rev JC Lalramliana leh Task Group member dang, Mizoram Upa Pawl president ni bawk Nghaklianmawia ten hun an hmang a ni.
Training turte chu a tawp thlenga zir ngei turin Malsawmzuala Ralte hian a chah a. Ruihhlo ngaite tan sawrkar chuan cheng vaibelchhe 2.5 chuang a seng tawh a, an lo that chhuah leh theihnan insenso zel pawh a inhuam reng tih a sawi. Europe leh Japan-ah Mizo thalaite tan hnathawh tur a tam tih sawiin, ruihhloa an fihlim phawt chuan foreign-a thawhna remchang a la awm dawn tih a sawi a ni.
Batch 1-na leh batch 2-naah trade pathum kalpui niin, assistant electrician, alluminium fabrication leh food processing-ah mi 78 an training chhuak tawh a ni.