Hunpui atan P&E inbuatsaih

Power & Electricity department chu hunpui thleng tura mipuiin tha zawka kawlphetha an hmuh theih nan inbuatsaihin an minister F Rodingliana hoin Thawhtanni khan an thukhawm a. Sawrkar siamtu ZPM-in ‘power policy’ a duan an zirho nghal.
P&E minister chuan ZPM thil tum lian ber chu ram rorelnaa Pathian ram tundin a ni a. Kan thiltihnaah Pathian ram tana thawk ka ni tih kan inhriat chuan corruption chu a bo mai dawn, tiin a sawi.
Tun atang chuan ZPM policy chu sawrkar policy a nih tawh avangin department lam pawhin ngaihven a, a hlawhtlinna tura theihtawpa hma lakpui turin a sawm tih sawiin, “ZPM policy hi kan kalkawng min hruaitu a nih tawh dawn avangin kan hriatchian a, kan rawn fo a ngai dawn a, kan lokal tawh dan nena inrem lo deuh a awm a nih pawhin, kan kalphung thar zir chunga inrawntlangin, a tul a nih chuan dan thar pawh kan duang mai tur a ni. Policy hi action plan-in kan zui anga, project-in kan um nghal dawn a, chumi tur chuan kan infinchhuah a, intawngtaipui tawn a ngai a ni,” F Rodingliana hian a ti.
Thutkhawmah hian kawlphethaa intodelhna tur chungchang, chak leh tha zawka mipui rawng an bawl theihna atana rawtna sawihoin, a bikin solar power leh hydro-electric power tharchhuah tihpun dan tur sawi a ni a. Hunpui laia khaihlak loa mipuiin eng an neih theih dan tur pawh sawi a ni. P&E secretary H Lalengmawia, engineer -in- chief Lalhmingliani Hmar leh superintending engineer chin an tel a ni.