Hunpuiah chhiatna lian thleng lo Halmawi khapin zawm hlawh lo

Krismas hman leh kumthar lawm a zo a, a intan chhung leh a hnu lam deuhah pawh Mizoramah chhiatna liantham tak thleng a awm thu hriat a ni lo. Hetihlai hian sawrkarin halpuah leh halmawi a khap chu a bikin Aizawlah zawm a hlawh lutuk loa, district thenkhatah erawh a zia viau nia sawi a ni.
2025 Krismas leh 2026 kum chuankai hlimah dan pangngaiin Mizoramah chuan kohhran programme a lian ber a. Inkhawm bakah hemi pual ruai theh niin, kum dang zawng aiin state pawn lam mi, he hunpui hmanga Mizoram-a rawn kalte hmel hmuh tur a tam thu sawi a ni.
Hetihlai hian Aizawl khawpui bikah hunpui chhungin buaina leh harsatna liantham thleng a awm meuh loa; December 24-a ruihhlo ngai khawm huk nghawng nge tih theihin, police station hrang hrangah pawikhawihna avanga man ngai an tlem a, zu ruih kaihhnawiha pawikhawih man leh rukruk kaihhnawiha mi tlemte man ngai tih loh chu lock up lam pawh a khat lo hle tih thu dawn a ni.
Damdawi in lamah lirthei chetsualna avanga lut an awm a, an tam lo nia sawi a ni. Zu kaihhnawiha damdawi in pan bakah ruihhlo tih luat avanga damdawi in pan an awm a; a tam zawk erawh damlohna dang avanga pan an ni tih damdawi in ho record atanga a lan thu sawi a ni.
Hriat theih chinah district dangah pawh chhiatna liantham leh buaina thleng a tam lo tih sawi a ni bawk.
Hetihlai hian sawrkarin hunpui, a bikin kumhlui thlahna atana halmawi leh halpuah a khap chu, Central YMA nen tangdunin theihtawp chhuah a ni chung leh, bazar-a man tur a awm meuh lo chungin, December 31 thimhlim atanga January 1 zing lam thlengin Aizawlah puak thawm hriat tur a tam a, zan dar 12 rik hma darkar chanve hmalam leh dar chanve hnulam thlengin halmawi leh a puak thei chi thawm hriat tur a tam hle. District dangah pawh hetiang thawm hi a awm naa, Aizawl ang chuan a nasa lo tih thu dawn a ni.