Police mi CID lemchang man. Police lemchang an man bawk

Police mi, CID lemchang man
Police lemchang an man bawk
Mizoram Police constable pali leh an thurualpuite chu ruihhlo zawrh kaihhnawih CID lem an chan avangin man an ni a, police lem changa ruihhlo kaihhnawih thoa midang bumtu civil mi thenkhat man an ni bawk.
Aizawl SP Zosangliana’n thuthar thehdarhtute a hrilh danin, 2024 December 15 zan khan MINECO (New Capital Complex) a Khatla Thlanmual kawngah ruihhlo – mnethamphetamine inlei sak tum an awm dawn nia thu an dawn angin Special Narcotics Police Station staff-te chu he hmunah hian an kal a. A hmun an thlen hian mi pathum (police mi leh sa vek) an lo awm a, heng mite hi hren nghal an ni. A hnu ah an zinga pakhat hian phone call a dawng a, Khatla lamah meth’ hi inhlan tura a rawn hrilh angin an kal a, Khatla-ah hian meth’ kengtu hmeichhe pakhat leh a thil keng hi an man ve leh a ni.
Methamphetamine an mansak hi a tak tak ni lo, a lem a ni tih hriatchhuah zui a ni a. A kengtu hmeichhia Lalrinngheti (35) Venghlui Aizawl bakah police constable pathum – RL Remlalnghaka (28) Zemabawk North, Vanlalringa (32) Bungkawn Veng, Andrew Lalremruata (29) Chanmari Veng, Aizawl, Aizawl District Executive Force hnuaia awm vekte chu thubuai siamsak an ni.
He thil chhuizuina atanga a lan dan chuan, heng an mi man te hi inthurualin dan phal loh damdawi lei duh tur an zawng a. An damdawi lei dan tur leh an inhlanna hun leh hmun tur an ruatfel hnu ah, police mi leh sa te hi CID officer anga insawiin an hmun ruatah hian damdawi lei tumtute chu manin, an damdawi leina tur sumfai chu an chhuhsak ta thin a, sum an chhuhsak hi a hnu ah an insem thin a. An mi mante hi a tuk lamah police station-a in report turin phone-a an la rawn koh tur thu in an thlah a, biak zui an nei lem lo. An inpuanna atanga a lan danin, hetiang hian vawi ruk ai tlem lo chu an lo ti tawh a ni.
A mi mante inpuanna atangin, police tho, constable Alex Lalnunfela (26) New Capital Complex Aizawl pawh a inhnamhnawih ve tih hriat a ni a, man ve nghal niin, thu zawhfiah an nih hnu ah court thu angin Central Jail-ah thawn vek an ni a, an hna atanga suspend nghal an ni bawk.
A ni bakah hian inhnamhnawih dang, civil mi – Lalchhanhimi (40) Kulikawn Aizawl, Lalnunpuii (41) Kolasib Venglai, Lalrinchhani (38) Electric Veng Lunglei leh Lalmalsawmi (41) Armed Veng South Aizawl pawh man belh leh an ni.

Heng mite vek hi case dangah an inhnamhnawih bawk a. Police-in complaint an dawn an bawhzuinaah Sangau lam mi Z Lalchhuansanga leh a thiante pahnih – Romalsawma leh Vanhleia te chu Aizawlah detonator lei tumin an rawn kal a. ITI Veng mi, an hmelhriat HC Lalrinkimi inah thlen chilhin, an ni ho hian kumin November 18 khan Ramthar Veng Chite Kaiah detonator lei tur nei inti, Lalrinchhani nen inpek an tum laiin, CID mi nia insawi hmaituam pali chuan an rawn nangching a, an sum kawl cheng nuai 5 leh detonator hi an laksak a ni.
Police-in an chhuichiannaah Lalrinchhani hian detonator lei tur a nei tak tak loa, a ‘sample’ angrengin gelatin tlawn khat chu a keng lang a, a dang a dahna nia bawm pakhat an phurh tel chu a ruak vek tih police hnenah hian an sawi a. Detonator lei duhte an bumna mai a ni tih sawiin, heta CID lemchang pawh hi a chunga tarlan police constable pathum – RL Remlalnghaka, Alex Lalnunfela leh Andrew Lalremruata bakah hmeichhe pakhat Krosshlupuii (37) Hunthar Aizawl a ni a. Lalrinchhani pawh hi a chunga tarlan tawh tho khi a ni.

Hengah hian methamphetamine lem hmanga inbumna leh mi pawisa chhuhsak bakah detonator hralh kaihhnawiha inbumnaah hian case pek belh an ni.

Hetihlai hian ruihhlo kaihhnawiha indawrnaah tho inbumna a thleng a. James Zoliana, Kanhmun Mamit district inti chuan ram a leina tur sum a ken chu a kentirte kut atangin miin an chhuh lui ni awmin police-ah complaint a thehlut a. Police-in an chhuichiannaah amah James Zoliana hian hnamdang pahnih a thurualpuite nen methamphemamine lei tumin Aizawlah an rawn kal a, kumin November 20 khan damdawi lei turin mi an tir a. An indawr laiin police nia ngaih theih mi pahnih chu bike-a rawn kalin, an zing ami pakhat chu an mi zawn lai a ni, tiin a kalpui am Rs. 17,40,000 an chhuhsak nia hriat a ni.
He case-a inhnamhnawih mi panga – Lalthlamuani, Electric Veng Aizawl; Lalmalsawmkimi, Armed Veng South Aizawl; Lalhmunmawia, ITI Vengthar Aizawl; Lalremruata, Chaltlang Aizawl leh Micky Lalmuanpuia, Edenthar Aizawl chu police-in an man a. Damdawi lei tur rawn zawnpuitu ber James Zoliana pawh hi police hnenah thu diklo a hrilh vangin thubuai siamsak a ni bawk. A nihna takah chuan a ni hi, hnamdang pahnih hian Rs. 50000 hlawha methamphetamine lei pui tura an rawn hruai a ni.

SP chuan an mi leh sa an mante bik chungchangah, dan bawhchhe turte veng tur zawk police mi leh sa dan bawhchhiatna lian taka an inhnamhnawih chu pawi an ti a. Criminal case an awrh mai bakah na taka hrem an nih theihnan departmental proceedings kalpuiin uluk taka chhuizui an ni tih a sawi a. Khawi emaw laiah he thila police inhnamhnawihte hremna tih nep tumin hun rei tak chhung he thu hi up beh ni anga police-te puhna chu a dik loa, a inhnamhnawih ho zawng zawng an phawrh fai vek theihnana thu ti darh mai rih lo an ni zawk tih a sawi a ni.