Hydel project tihpuitlinna tur bawhzui

Power & Electricity minister F Rodingliana chuan New Delhi-ah sawrkar laipui hotute hmu in hydel project tih puitlinna tur a bawhzui.
Union Power minister Manohar Lal Khatta nen an inkawmnaah Mizoram sawrkarin kum thum hmalama project a lo thehluh tawh, kawlphetha pek chhuahna – transmission line leh power sub-station tih changtlungna tur central ministry-in a pawmpui tawh, bawhzui loha a awm avanga fund la pekchhuah loh chu thlenin, Union minister hian heng sum hi an pekchhuah tur thu a lo hrilh a. Ministry of Power-in hydel project liantham siamna tur scheme thar a duan chu chhawr tangkai turin central public sector undertaking-te nen thawkho a, project thehlut thuai turin a lo hrilh bawk.
New & Renewable Energy minister Pralhad Joshi a kawmnaah Mizoram minister hian kawlphetha hmanga intodelh chu Mizoram sawrkar policy lian ber a nih avangin hydel project iam tur state sawrkarin a buaipui mekte MNRE hnuaia scheme hmanga tihpuitlinsak turin a ngen a. Pralhad Joshi hian small hydel project tihlawhtling turin MNRE-in a puih tur thu a lo hrilh.
Commerce & Industry minister ni bawk F Rodingliana hian Food Processing minister Chirag Kumar Paswan pawh hmu in, Mizoram food processing industry-te tilian a, tichangtlun a nih theih nan hma lakpui turin a ngen a. A bikin Mizorama thlai tha em em leh hnianghnar – sawhthing, aieng leh hmarcha sawngbawl kawngah Food Processing ministry puihna ngenin, Union minister hian project engemawzat siama thehlut tura chahin, a lo bawhzui tur thu a hrilh a ni.
New Delhi-a a cham chhungin F Rodingliana hian Department of Economic Affairs, Asian Development Bank bakah Commerce & Industries leh Power sector hnuaia ministry hrang hrang hotu liante hmu in, Mizoram sawrkar hmalakna kal mek a bawhzui a, chak zawka tihpuitlin a nih theih nan a nawr nghal a ni.