I fa kha chi al ei tam tir suh

Britain-a health expert te chuan naupang ten thil al an ei nasat lutuk avangin an hriselna atana risk hlauhawm tak an la nasa ta hle niin an sawi.
Naupang te hian chi (salt) leh thil al an ei nasa hle a, nitin-a an mamawh tawk aia 50% vela tam chi leh thil al an ei thin niin an sawi a, hei hian nun a ti tawi thei niin an sawi bawk.
Chi al ei nasat lutuk hian blood pressure a ti sang a, a lo rei hnuah stroke (thluaka thisenzam chat/block) leh heart attack te a thlen thei niin an sawi.
Zirchianna neitu te chuan Britain-a naupang ten nitin-a an ei langsar zuala chi awm tam dan enfiah a, 9.3g atanga 9.6g te a awm tlangpui a, chutih laiin naupang kum 7 leh kum 10 inkar te tana chi maximum recommend chu 5g chauh a ni thung. Nikhat-a chi 9.6g ei thin chu a let dawna tam a ni.
Nikhata chi mamawh dan hi kum upat dan azirin a danglam a, anusen tan chuan 1g vel chauh a ni. UK-a mithiam te chuan naupan laia chi al ei nasat lutuk chuan puitlin hnuah nghawng a nei ni a sawiin, naupan lai atanga chi al ei in-control chuan UK-a kumkhata heart attack leh stroke thleng tur 70,000 vel zetin a tihniam thei dawn niin an chhut a ni.
Katherine Jenner, Consensus Action on Salt and Health a mi chuan, “Bread, cereal, cheese, tomato sauce leh sa tin-ah te hian al a tam zual a, chuvangin heng ei tur te hi i fa chu nitin ei tir lem suh. Chaweinaah chi bur chhawp chhuak lo la, al ei tang chuan kan duh al a, chawhmeh al vak loa ei te hi kan taste bud-in reiloteah ngaiah a lo ve mai dawn a ni,” a ti.
Katherine chuan, “Naupan laia blood pressure sang te chuan an puitlin hnuah pawh BP neih chhunzawm zel an awlsam bik a, i fa chu chi ei tlem tura i control chuan a puitlin huna a hriselna tur kawng i lo sial sak a ni tih i hre dawn a nia,” a ti bawk.