I kawppui nena in inlaichinnain tihtawp a hun em?

I kawppui nena in inlaichinnain tihtawp a hun em?
I kawppui nena in inlaichinna chuan a tawp a thleng ta a, kal zel ngaihna i hre tawh lo a ni mai thei. Mahse, kan inkar chu tihtawp a hun tih kan hrethiam lo va, a thawm that dan a awm em tiin kan buai a, mahse, lung bang kan su a, kal zel ngaihna a awm tawh lo a lo ni reng si. Tun tumah hian relationship lama mithiam ten kappui te nena kan inlaichinna tihtawp a hun tih hriat theih dan ni a an sawi te kan rawn tarlang e.
Kan intawn tirh chuan kan tek deuh chiai chiai a, engkim mai chu a nuamin a mawi vel vek! Mahse, tunah erawh hmelma ang mai kan ni ta si…engtia tih tur nge ni ta ang? Kan inhmangaihna kha a tawp ta em ni? Hetiang hi a thleng ve thei tlat. Ngaihzawng neih emaw kawppui neih emaw chu lasi thawnthu ang maia nuam tur niin kan ngai a, a tirah chuan a nuam reng lah taka, mahse, chutiang reng chu a lo ni si lo. Thil thlum khan khâk hun a lo nei a, kan inlaichinna boruak pawh a buai ta nak mai. Kan inlaichinna chu tihtawp mai chi nge a siamthat dan zawn tur tihah kan buai thin. Tun tumah hian kan inlaichhinna te tihtawp mai a hun tih hriat theih dan ni a mithiam te sawi kan rawn tarlang e.
1. In induh ve viauin i hria a, mahse, i tana mi special chu i thian ten, “Engtikah nge kan hmelhriat ve dawn?” ti a an zawh che apiang a, “Nakin deuhah, remchang hmasa berah,” tia i chhan deuh zel a ngai a nih chuan i inngaihtuah chian a hun. I ngaihzawng/kawppui chu i thiante nena inhmelhriat tir chak vak lo a, midang zingah ‘single’ anga awm i thlahlel zawk a nih chuan in inthen mai a tha zawk ang. Ngaihzawng nei lo anga lan i duh miau chuan eng nge ngaihzawng neih chu a tulna. In pahnih inkar kha chuti takin a thuk lo va, a tha nghah nan in inhmang vel mai mai ang lek a ni. Rilru in inhliam nasat hmaa inkalsan mai a fuh zawk.
2. In inrin tawn loh chuan inthen mai a tha zawk. Sum chungchangah a kutah engkim ngaihngam taka i dah meuh lo a nih chuan inthen a tha zawk ang. Chutiang bawkin nang aia hmeltha leh duhawm zawk ni a i ngaih i thian dang nena i ngaihzawng/kawppui chu i inhmelhriattir dawn a i rilru a ngam zân thin lo a nih a, eng emaw ngaihthat loh deuhna i nei leh thin a nih chuan inthen mai a tha zawk. I ngaihzawng lakah rinna i neih theih loh chuan in pahnih khan awm dun tur in ni lo.
3. In inhau deuh reng mai em ni? Engtik nge inpahniha hun hlimam tak in hman dunna hnuhnung ber kha, han chhut vang vang teh, i ngaihtuah chhuak zo meuh lo a nih chuan inngaihtuah a hun. Hlim taka hun inhman dun lai ngaihtuah chhuah tur awm mang si lo a, in inhauhlai erawh ngaihtuah vak pawh ngai lo a i hriatchhuah nghal zung zung si chuan, in pahnih chuan awm dun aiin inkalsan a fuh zawk ang.
4. I ngaihzawng/kawppui chu rinawm loh san lampang te i ngaihtuah tawh ngai em? Chutiang chu i rilruah a lo awm a nih chuan in inlaichinnaah thil fel tawk lo a awm tihna a ni a, inngaihtuah nasa ang che. Kawppui te rinawm loh san lam lam te rilrua a lan tawh chuan kan kawppui te nena kan inkar a tha lo tawh hle tihna a ni. I ngaihtuahna chu a takah i la chantir lo a nih chuan, chu ngaihtuahna chu ‘mangtha’ hmiah la, i ‘mangtha’ thei ngang lo a nih chuan rilru intihnat sak hmaa inthlah mai a tha zawk.
5. Inpahnihin hmalam hun nei loa inhriatna i nei em? In inkar chu ‘ni ve zuai’ anga hriatna i nei a, mahse, i kappui lakah chuan serious anga lan hram i tum ve bawk si a, chutiang chu a fair-lo khawp mai. In ‘ni’ tan ve deuh a, mahse, ‘nih’ rei pui vak i tum lo a nih chuan tunah khan titawp nghal law law rawh.