I kawppuiin in intihthiam lohna te chu online-ah a post chuan…

I kawppuiin in intihthiam lohna te chu online-ah a post chuan…
Psychologist emaw relationship counsellor emaw te pawh zawt ila, kan tunlai khawvelah social media-in kan kawppui te nena kan inlaichinna a nghawng nasat tawh zia hi sawi tur an hre teuh ang a, social media hman dana fimkhur a tul dan leh nupa leh inngaizawng te inkara harsatna thlentu a nih theih dan min hrilh tur pawh an hre hnem viau ang.
Pew Research Center survey-ah chuan thangthar 45% zet chuan social media-in an kawppui te nena an inlaichinnaah a tha lo zawnga nghawng a neih thu an sawi. Social media hi kan rilru natna puan chhuah nan ten kan hmang nasa ta hle mai a, kan ngaihzawng emaw kan kawppui emaw te nena kan intihthiam lohna boruak thlengin kan tarlang a, social media kal tlanga han inkhei deuh fak fak te kan ching ta hle. Hei hian a tha lam aiin a chhe zawngin boruak a nei zawk tlat thin. Chuvangin hemi chungchanga hriattur pawimawh ni a relationship lama mithiam te sawi kan rawn tarlang e.
1. I ngaihzawng/kawppui chu social media khawih nasa chi a ni em tih thlithlai la, a hun awl apianga khawih chi a nih leh nih loh te, in pahniha awm dun theihna hun tur te pawh a tibuai em tih thlengin ngaihtuah la, thu pawimawh deuh i sawipui lai te khan a timeline-ah eng eng emaw a lo post thin te a nih chuan, in pahnih inkar boruak eng emaw hlek a awm chuan social media-a au chhuahpui a hreh dawn lo tih hriat lawk tur a ni a, social media a atchilh tan ta hle a ni tih a inhriat theihnan i hrilh hriat a pawimawh ang.
2. Eng emaw intihthiam lohna deuh in neihin, i hriatthiam theih tur si a eng emaw ti taka tawngkam dengkhawng deuh a social media-a han comment zauh te a ching em? I bulah sawi tha duh si loin, mi zawng zawng hriat tura social media a sawi chhuah te a thlang leh zawk a nih chuan, in harsatna relationship lama mithiam leh counsellor te rawn a, titi pui a tha hle ang.
3. Social media-ah i tana hriat nuam lo tak a post a nih pawhin social media khawih duh loh phah nana hman tur a ni chuang lo. Eng chen nge a kalpui tih te i hriat a pawimawh zawk. Social media-ah chhang let ve mai lovin titi pui la, a online nungchang chuan in inlaichinna a tihchhiat theih dan te sawipui la, hetiang thila pawmzam theih leh pawmzam theih loh chin ramri fel takin kham pui ang che.
4. Social media engtin emaw tak min rawn tih hian chhan let ve nghal chakna kan nei thin a, ngawihbo mai harsa kan ti thin. Kan chhang let dawn a nih pawhin fimkhur a pawimawh a, tawngkam hmanah intihnat belhchhah theihna lam pumpelh a tha a a, boruak vaw zawi zawnga lak thiam a pawimawh hle.
5. I kawppui chuan hetianga in inkar harsatna te social media a tlangaupui chiam zel chu a sim hleithei lo a nih chuan in inzawmnaah chuan eng emaw dik lo a awm tih i pawm thiam mai a tul hun a awm ang a, a khawi laiah nge dik lo awm tih zawn chhuah thiam te a pawimawh ang.