I ngaihzawng nen in kum a inthlauh viau chuan…

A tlangpui thuin kan kuam rualpui te nen kan inngaizawng thin a, kum hnih khat emaw a inupat hleih emaw, a thla bi emaw te pawh a ni ang, mahse, chutiangah chuan harsatna a awm em em lo. Mahse, ngaihzawng/kawppui te nena kum inthlauhna chu a tam tham deuh a nih chuan a nawmna leh harsatna chi hrang hrang awm thei a ni. Tun tumah hian i kawppui nen inkum inthlauhna a tam tham deuh a niha thil hriattur pawimawh ni a relationship lama mithiam te sawi kan rawn tarlang e.
1. Kum a inthlauh deuh chuan khawvel kan thlir dan leh ngaihtuah dan te pawh a inang lo thei a, thil hrang hrangah ngaihdan inan loh te pawh awm thei a ni a, chu chu thil nihphung lo turah ngaih tur a ni lo. A pawimawh ber chu ngaihdan leh thlirdan in zahthiam sak hi a ni. Ngaihdan leh thlirdan inan loh thinna chu intihbuai tir duh tur a ni lo e.
2. Kum a inthlauh viau chuan bedroom nupa nun lamah pawh phur dan a inang lo thei tih hriat tel tur a ni a, kan phur dan a inchen lo chang a awm thei ang. Chuvangin, inpawh taka thil sawidun thin tur a ni a, phur dun hun inngaihchan thiam a pawimawh.
3. Kawppui te nena kum inthlauhna a tam deuh chuan a tirah harsatna em em a awm lo, mahse, a lo rei deuh hnuah nuam tih zawng leh ngaihhlut zawng te a lo danglam thei a, kawppui te laka beiseina te pawh a inang lo thei tih hriat tur a ni.
4. A khalhtu zawk nih tum loh tur a ni. A tlangpui thuin a upa zawkin thutlukna siamtu leh a kaihruaitu zawk nih tumna an nei duh hle. Chutihrualin, a naupang zawkin a ngaihdan leh hmuhdan te sawichhuah harsat chang te pawh a neih phah thei a, puitling lo a inhriatna leh inngaihhniamna te pawh a neih phah thei. Mahse, kan hriatreng tur chu, kan ngaihdan leh duhdan te zalen taka kan sawidun theih leh thuneihna inang kan neih chauhin kan kawppui te nena kan inkar a hlawhtling ang.
5. Kum a inthlauh chuan kan thian kawmte pawh an lo inang lo tlangpui thin. A pakhat zawk tan ani aia upa deuh hlir bula awm nuam lo tihna a awm thei a, chutiangin a pakhat zawk tan pawh ani aia naupang zawk hlir bula awm nuam lo tihna a awm ve leh thei bawk. Group khatin weekend-a lui kal te an phur viau laiin, a griup dang chuan hahdam taka film em mai mai te an thlahlel zawk pawh a ni thei. Hengte hi inhriatthiam tawn a ngai thin.
6. Engpawh ni se kum inthlauhna chu sawihchhuah a, kawppui te nena kan inkara harsatna awm chhanah puh fo loh tur a ni. Eng emaw intihthiam loh leh ngaihdan inan loh changin kum inthlauh vanga puh ngawt zel tur a ni lo. Kum inthlau deuh te pawh hlim takin an inkawp reng thei a, inrualpui deuh inkawp ten harsatna an nei lo a ni bik lo, kawppui te nena kan inkarah harsatna hi tute pawhin tawh chang kan nei vek zawk a, chutiang hunah kan thil thlir dan hi kan inzawmna tihngheh nana pawimawh ber chu a ni zawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More