NEET-UG paper ru chhuaktu ber man

Bihar-a Hazaribagh a National testing Agency trunk atanga NEET-UG paper ru chhuaktu leh a thurualpui te chu CBI ten an man ta a. Paper ru chhuaktu ber Pankaj Kumar chu Patna-ah man niin a thurualpui Raju Singh chu Jamshedpur-ah man a ni thung.
Kumar, Aaditya tia hriat lar bawk hian kum 2017 khan NIT Jamshedpur atangin civil engineering a zo a ni.
Central Bureau of Investigation (CBI) te chuan a hma in Hazaribagh chu NEET-UG paper putrukna bulpuiah an ngai a, paper chu Hazari Bagh a Oasis school atanga putru tan niin CBI te chuan an sawi a, he school a thleng paper set hnih te chu a seal tihchiat a ni chungin school staff te chuan thuneitute hnena sawi lovin an ngawihpui mai mai zui a ni.
“SBI Hazaribagh atangin question paper set kua thawnchhuah a ni a. Oasis school centre a thleng te hi an seal tihchhiatin a awm a ni. Staff ten engmah an sawi lo va, hei vang hian an inhnamhnawih ve em tih pawh chhui chian tur a ni” tiin senior officer pakhat chuan a sawi a.
“Technical evidence an neih behchhanin Learn and Play School, Patna chu dap nghalin chutah chuan paper hal tawh hnuhma an hmu a ni,” tia sawi bawkin a hnuah case chu Bihar Economic Offences Unit (EOU) ten an kutah an la zui tiin a sawi bawk.
June 21 khan NTA te chuan Oasis school a paper leh code te chu a inmil chiah tiin an lo sawi sa tawh a.
He school principal Dr Ehsanul Haque chu Hazaribagh a NEET-UG exam district coordinator niin vice-principal Imtiaz Alam pawh centre coordinator a ni bawk.
CBI te chuan medical entrance exam a thil fel lote chu chhui mekin First Information Reports (FIRs) an ziaklut tawh a, mi 60 dawn an man tawh bawk.
NEET-UG exam chu National testing Agency te huaihawt niin MBBS, BDS, AYUSH leh a kaihhnawih course te sorkar leh private institution a zirtur thlanna a ni a, kumin May 5 khan exam neih a ni. He exam hian sel a hlawh hle a, cheating leh aiawha exam tihte pawh sawi a ni hlawm a. CBI tena an chhui bik hi chu Bihar a paper leak chungchang bik niin gujarat, Rajasthan leh Maharashtra-ah te candidate aiawha exam tih leh cheating case registered in a awm thung.
Kumin hian May 5 ah exam khawpui 571 a centre 4,750 ah neih niin ram pawnah hmun 14 ah neih a ni bawk a. He exam-ah hian 23 lakh candidate an exam a ni.
Kumin exam a full mark 720 chu zirlai sawmruk pasarih ten an hmu a, NTA history ah hetianga exam a perfect score tam tum a la awm lo. Haryana centre atangin perfect score hmu paruk awmin perfect score hmu an tam lutuk avang hian rinhlelhna a piang zui a. Zirlai 67 laiin perfect score an hmuhna chhan hi grace mark pek vang tia sawi a ni bawk.
July 1 khan NTA in result a siamthat nawn lehah top rank chelh chu mi 67 atangin 61 ah an tlahniam a, hei hi mi 1,563 in re-test an neih leh hnuah a ni. June 24 a re-test neih leh tura tihah zirlai 48% an inlan duh tawh lo thung a. Zirlai 813 inlanin 750 in an test nawn lo thung tiin National Testing Agency data chuan a tarlang a ni.