I taksain tui a mamawh tih engtin nge i hriat theih ang?

I taksain tui a mamawh tih engtin nge i hriat theih ang?
Mihring puitling taksa hi 60% chu tui a ni e an ti a, chuvangin tui tel lo chuan kan dam thei lo. Kan taksain tui a tlakchham hian harsatna chi hrang hrang- sam tla atanga BP chiang lo thlengin a thlen thei niin an sawi. Hei le, Times of India health section-in dehydration symptoms (taksain tui a tlachham tih lanchhuah dan) ni a an sawi te kan rawn tarlang e.
1. Kan tum reng vang pawh ni loin tihrawl a rawn phu deuh zeih zeih a, second reilote atanga minute thleng pawhin a ni thei. Calcium, potassium leh magnesium tlakchham vang leh dehydration vangin a awm thei.
2. Kan taksa peng hrang hrang tam zawk tuiril atanga siam a nih avangin kan taksaa tui a tlem chuan kan vun a lo chuar a, kum naupang te siin vun chuar leh vuna inrin nek nuk te a lo tam thin. Hetiang pumpelh nan tui in tam a pawimawh hle.
3. A chhan hriat si lohin i chauin i zawi riau a nih chuan dehydration vang a ni thei.
4. Tui kan talkchham chuan kan pumah acid a lo tam a, chu chuan pum ulcer te pawh a siam thei.
5. I ek a khal em? Tui i in tlem vang a ni thei. Ek khal a san vak vak a ngaih hian piles te a thlen thei.
6. Chaw eikham hnu deuh lawkah i pum a nuam lo thin em? Dehydration vang a ni thei. Taksain tui a tlakchham hian chaw paitawih lamah harsatna kan tawk duh hle. Mahse, chaw ei lai leh chaw ei kham hlimah erawh tui in tam loh tur.
7. I ka leh hrawk te a khawro riau em? Dehydration vang a ni thei. Taksain tui a tlakchham chuan chil te a lo tlem a, chu chuan ka leh hrawk a tiro thei.
8. BP sang emaw a hniam emaw i nei em? Taksain tui a tlakchham hian thisenzama thisen luang vel a titlem a, chu chuan BP lama harsatna a thlen thei.
9. I cholesterol level a sang em? Kan cell ten tui an mamawh khawp an hmuh loh chuan kan taksain tui a hloh zel tur ven nan cholesterol a siamchhuak thin a, chu chuan cholesterol a tisang ta thin. Cholesterol sang chu lung (heart) natna thlentu langsar ber pawl a ni.
10. BP sang emaw hniam emaw avangin lu a hai thei a, chutiang bawkin tui tlakchham avangin luhaiin a tluk phah hial theih a, lu na te pawh a thlen thei.
11. I lung a phu deuh dup dup em? Dehydration vang a ni thei.
12. Hnar kua leh thawkna dawt te hi a hnawng reng tur a ni a, chu chuan natna hrik ten kan thawkna dawt kaltlanga chuap an thleng tur a veng thin. Mahse, taksain tui tlakchham chuan hnarkua leh thawkna dawt te a lo ro a, respiratory problems chance a tisang thin.
13. I vun a khawroin a thak em? Taksain tui a tlakchham vang a ni thei.
14. I hah viau hnuah pawh i thlantui chhuak tur a awm lo em ni? Taksain tui a tlakchham vang a ni thei. chu chuan kan taksaah tur a chhekkhawl a, natna hrang hrang kan neih phah thei.
15. A chhan hriat tur awm si loin i luak a chhuak deuh nghulh em? Dehydration vang a ni thei. Tui hi luakchhuak tih reh nan pawh a tha hle. Taksain tui a tlakchham chuan luakchhuak bakah lu-na pawh a siam thei.
16. Dehydration vangin mit a ro thei a, chu chuan mit a ti thipin men a tihar a, kan meng sen deuh râm thin.
17. I zun a tlemin i zun rawng a lo danglam a nih chuan dehydration vang a ni thei. Kan zun tam loh hian kan taksaah tûr chi hrang hrang a inchhek khawm thin a, zun tam nan tui in tam a pawimawh hle.
18. A chhan hriat si lohin ruhchuktuah na i nei em? Dehydration vangin ruhchuktuah tinaltu a lo tlem a, chu chuan ruhna a thlen thei.
Mithiam ten an chhut danin hmeichhiain nikhatah tui litre hnih leh a chanve vel an mamawh a, mipain litre thum leh a chanve. Zun rawng hi taksa tui awmdan hriat theihna awlsam ber a ni a, i zun chu a uk tak deuh ngaih a nih chuan tui i mamawh tawh hle tihna a ni a, i zun rawng chu a fim emaw a eng dal deuh raih chuan tui i la tlachham lo tihna a ni.