IAF-in NEET-UG 2026 zawhna phurh hna zo fel

Indian Air Force (IAF) chuan medical entrance re-examination neih leh turah ram pumah NEET-UG 2026 zawhna phurh hna an thawk a, Nilaini khan an zo fel.
ANI tar lan danin IAF hian exam centre-a zawhna thawn chhuahna atan hian ni li kalta chhung khan thlawhtheihna 200 chuang a thlawhtir tawh a. June 13 atangin zawhna phurh kual hna hi an tan a ni.
June 21 hian exam nawn leh tura ruahman a ni.
Zawhna put ru a awm nia sawi a awm avangin NEET-UG 2026 exam hi a hmasa zawk kha thiah/tihtawp a ni a, exam nawn leh tura tih a ni.
Sorkar chuan zawhnate chu him leh a hun taka phurh thlen a nih theih nan leh tihdanglam emaw, put ru emaw a awm theih tawh lohna turin air force hi a phur turin a ti a ni.
Bungraw phur thlawhna leh helicopter hmangin sem chhuahna hmun (distribution hub) pahnih atanga exam paper lak khawm a ni a, hmun 20 chuangah phurh thlen a ni tawh bawk a. Thuneitute chuan venhimna thil vangin an thlawhna hmunte hi an puang zar rih lo thung.
Tun tuma exam zawhna heti taka buaipui ngai hi tun hnaia ram pum huapa exam-a venhimna kalpui khauh ber zinga mi a ni.
Exam huaihawttu, NTA thuneitu chuan air force hman a nih chhan chu a hun taka zawhna thlen leh enfiah nawn lehna tura venhimna ruahmanna tihchakna tura ruahman a nih thu a sawi.
NEET-UG 2026 exam-ah khan zawhna put ru a awm nia sawi a awm avangin National Testing Agency (NTA) chuan May 12 khan exam hi an titawp a, chhui chian a nih hnuah zawhna lehkha tihchhiat a nih thu an sawi a. May 3-a exam neihah khan khawpui 551-ah candidate maktaduai 2.27 vel an tel a. Chhuitute chuan test neih hma hian zawhna thenkhat a darh tawh niin an sawi.
Tun tum buaina hi a zawna kum hnihna a ni a, kumin hi ram chhunga medical entrance examination lian ber zingah thil dik lo thleng nia sawi a ni a. NTA chuan Central Bureau of Investigation (CBI)-ah thlenin June 21 khan candidate maktaduai 2.2 chuangte chu exam nawn leh a nih tur thu a puang zui a ni.
Ruahman dan chuan Delhi atanga Madurai thlenga zawhna thawn chu thlawhna hmanga phurh a ni a. Madurai atangin venhimna hnuaiah Indian Army helicopter hmangin Tirunelveli-a Armed Reserve Ground-ah sawn tura tih a ni.
A taka tih hma hian enchhinna neih a ni a, lirthei kal dan tur thlenga enchhin a ni.
Exam nawn lehnaah hian thil dik lo a awm tawh lohna turin fimkhurna leh venhimna khauh taka kalpui a ni a. NTA chuan ram pumah June 22 thleng hun bituk chhung atan Telegram hman khapna a siam phah bawk.