IAF kuta airport hlan tumna hnukkir turin Airport Forum-in sawrkar ngen

IAF kuta airport hlan tumna hnukkir
turin Airport Forum-in sawrkar ngen
Mizoram sawrkarin Indian Air Force kuta Lengpui Airport hlan tura thuthlukna a siam tawh chu hnukkir leh turin Lengpui Airport Forum chuan an ngen a. Airport Authority of India-in state danga airport an enkawl ang bawka laksak turin political level-ah sawrkar laipui hnena thlen turin an ngen bawk.
Lengpui Airport Forum convener Lalthuamliana sawi danin, Mizoram sawrkarin a ruahman dan chuan, runway leh Air Traffic Control (ATC) bakah runway sir lehlam ram zawng zawng IAF-in an chang anga, a bak zawng – terminal building, security, fire services, ticketing adt. state sawrkar kutah a awm zui ang.
Sawrkarin airport hlan chhan tura a chhuanlam, airport enkawl hautak chu a ziaawm phah dawn loa, state police leh central armed police force enkawlna, electric power atana chawi, terminal building enkawl leh thuamthatna senso chu state tum tur a la nih dawn avangin sensoah phurrit ala awm reng dawn tho a, chutihlaiin IAF kuta runway leh ATC a awm chuan domestic flight pawh an control-na hnuaia a awm a ngai tawh dawn tihna a ni tih a sawi.
“Heng ruahmanna hi ‘civil enclaves’ an ti a; civil enclave-ah hian military transport planes leh jet fighter base a awm hrang a. Myanmar leh Bangladesh-ah China sawrkarin zung kaih thuk tuma a beih nasat dan leh Mizoram chu heng hmun pahnih atana tanhmun pawimawh a nih avangin IAF hian jet fighter base atan an hman ngei a rinawm,” a ti. Hetiangah hian civilian-te an chep zual bik tih a sawi.
“India state danga IAF airport tawmtuten harsatna an tawh nasat avangin airport thar siam tura hma an lak mek lai a, IAF kuta kan airport neihchhun hlan kan tum tlat hi tih chi ah kan ngai lo,” Lalthuamliana hian a ti.
Mizoramin hmasawnna atan South East Asia ram nena intlawhpawh turin international airport kan mamawh tawh lai a, IAF kuta airport kan hlan chuan, unternational airport neih chu a beisei awm loh dawn tih a sawi.
Airports Authority of India (AAI) thil tum ber chu India rama commercial airport siam, tihhmasawn leh enkawl a ni a. AAI enkawl airport tam zawk chu hlawkna awm loa kalpui a ni mek tih Airport Forum convener hian a sawi. Heti a nih laia Lengpui Airport bikah AAI-in Mizoram sawrkarin a pawm theih lo term khirh tak a siam nia hriat chu a lungawithlak loh a, Mizoram bik tana AAI-in ‘terms and conditions’ hrang a siam hi nasa taka lungawilohna sawrkar laipuia thlen ngai ni zawka an ngaih thu a sawi a ni.
“AAI-in airport dangte a enkawl ang bawka kan airport min laksak duh lo a nih chuan, political party-ten indem leh inchirhtheh nana hmang loin, an kuta an lak theihna tura sawrkar hmalakna thlawp ila. NGO leh mipui pawhin hnam thil, nghawng thui tak la nei thei a nih avangin AAI kuta hlan a nih theihnan sawrkar hmalakna thlawp tlat turin kan ngen a a ni,” a ti.
Forum hi kumina din a ni a, nikum December vel atanga inrawnkhawm tan a ni. Zawhna chhangin Forum hruaitute chuan, IAF kuta Lengpui Airport hlan lo tur hian NGO Coordination Committee pawhin sawrkar a lo ngen tawh a, intelkhawma hma lo lak ve ngai turah an ngai loa, mimal ang erawh chuan media kaltlangin an lo auchhuak fo tawh tih an sawi. IAF kuta hlan tuma cabinet-in thu titlu nia an hriat hnu ah Forum hi a ding ta a, he thuthlukna siamna, cabinet meeting minute tun thlenga sawrkar thuchhuaka mipui hriat tura puanzar a la ni lo pawh chu mak an tih thu an sawi a ni.