IAF ram lei dan chhuichiang turin sawrkarin CBI kutah thawn tawh

IAF ram lei dan chhuichiang turin
sawrkarin CBI kutah thawn tawh
Sihphir leh Lengpuia Indian Air Force-in ram a lei dana thil fel lo awm nia sawi chhuichiang tura ngenna chu Mizoram sawrkar chuan Central Bureau of Investigation (CBI) chhui turin an thawn fel tawh tih chief minister Lalduhoma chuan a sawi.
Assembly Session-ah leader of opposition Lalchhandama Ralte chuan IAF ram lei dana CBI chhuitir tura ngenna thehluh tawh chu engtin nge Mizoram sawrkarin a bawhzui zel tih a zawt a. CBI-in case an ziahluh tawh leh tawh loh a zawt bawk.
Chief minister chuan, CBI hnenah hian 2026 February 22 khan sawrkar chuan a thawn thla tawh a, document an rawn dil angin sawrkar (chief vigilance officer) hnena MNF hotupa in a thehluh chu pek tur an neih chhun a ni mai tih a sawi.
“Case an ziahluh tawh leh tawh loh sawrkarin a la hre bik loa, min rawn hriattir leh kher dawn nge kan hre loa, kan la inberawn ang chu,” a ti.
Chief minster chuan IAF ram lei danah hian a tir te atangin ‘outright purchase’ tura hma lak a ni a. IAF hnena sawrkar hmasate thil thehluhah ram hi neitu chiang tak nei, Pu Rohmingliana chu ram neitu dik tak a ni tih an lo zu thehlut a, chu chu an ni chuan an ring zui tih a sawi.
Sihphir leh Lengpui ram lei tura pillar phun zat nen lam an lo thehlut vek a, a ramah buaina engmah a awm loh thu state sawrkar leh Aizawl DC atangin no objection certificate (NoC) an thehlut a; Sihphir leh Lengpui VC leh NGO atangin NOC thehluh a awm bawk tih a sawi. Tunhnu ah hetihlaia khawtlang hruaituten NOC an siamsak loh thu an sawi leh takah chuan khatihlaia sawrkar khan a lo siam chawp nge an hre bik lo tih a sawi a ni.
Ram ruak (barren land) a ni an tih avangin environment clearance lak a ngai loa, mi cheng an awm loh avangin rehabilitation tih ngai a awm loa, hetiangah hian SIA (social impact assessment) pek mai thin a ni a, sawrkarin SIA a pe mai lo thei ta lo tih Lalduhoma hian a sawi.
IAF hnena ram lei tur kawhhmuh dan chu a dik lo tih sawiin, a danah chuan, sawrkarin ram an lei duh thu an tichhuak hmasa anga, ram neitute rawn in report tur an nih laiin, Pu Rohmingliana chiah hi a lang ta a, an process miah miah mai tih a sawi a ni.
“Engkim heti khawpa an lo zu thehluh fel tawh avangin kan sawrkar hnu ahchuan sawibuai tur a awm lo a. Heti chung chung hian lo sawibuai ni ta ila, India sawrkar ngaihah pawh natinoal security ngaipawimawh loah pawh min ngai thei ang,” a ti.
“He thu House-a rawn phawrh thintu chu MNF member-te an ni a, resolution hial an thehlut a. An ni hi he thilah hian an tel pawh ka ring lo. A tel tur kan zawng dawn a nih chuan khatihlaia chief minister te, Revenue minister te kha an ni,” a ti bawk.
Chief minister hian kum 2019- 2023 chhunga sawrkarin social impact assesment vawi 120 an lo pekna document chu House property-ah a hlan nghal tih a sawi a ni.