Ice Spice-i’n Taylor Swift a fak

Tunlai rapper chawrno leh duhawm Ice Spice chuan Taylor Swift fakin amah chher hriamtu, a mentor anga a ngaih thu a sawi a, “Thurawn tam tak min pe a ni,” a ti. Hetiang tho hian a rapper pui Nicki Minaj hnen atangin thil tam tak a zir tih a sawi bawk.
Ice Spice hi zaithiam hrang hrangin an thawhpui nasa hle a, a tel ve tawhna hla te a lar duh phian lehnghal a, Taylor Swift nena an thawh dunna ‘Karma’ remix pawh a hit khawp mai. Ice Spice chuan Taylor Swift inngaihtlawnna leh thawhrimna a fak hle a, “Amah hi a duhawm tawp a ni mai, a inphah hniam theiin a thawkrim em em a ni. Keipawh thurawn tam tak min pe a, kan tawng deuh reng a ni mai, a bula awm a hlimawm,” a ti. ‘Karma’ remix hi Billboard Hot 100 (singles) chart-ah pawh No.2 a kai pha a, New Jersey-a Swift-i’n Eras Tour a neihnaah pawh live-in he hla hi an perform dun nghe nghe a ni.
Swift dawrah chuan rap icon Nicki Minaj hi Ice Spice tana mi pawimawh a ni leh a, an thawh dunna hla ‘Princess Diana’ chu Hot 100 chart No.4 a kai a, ‘Barbie World’ pawh No.7 a kai. Ice Spice chuan Minaj bula a chettlatna atangin thil tam taka zirthiam phah niin a sawi a, “A tihsual tawh atanga inzir turin min ti a. A che vel hi uluk taka en chuan eng nge kan tih ve tur kan hre nghal mai a ni. Mi nawlpui hnena ka sawi thei loh thil tam tak ka sawi theihna a ni bawk. Ani ang ka nei thei hi ka tan a hlu tak zet a ni,” a ti.
‘Karma,’ ‘Princess Diana’ leh ‘Barbie World’ bakah Ice Spice hian PinkPantheress a thawhpuina ‘Boy;s a Liar, Pt. 2’ chu Hot 100 chart No.3 a lo kaipui tawh bawk a ni.