ICFAI-in convocation hmang

ICFAI-in convocation hmang
ICFAI University Mizoram chuan anmahni hmun Durtlang North-ah Nilaini khan Convocation tum 12-na an hmang a. ICFAI University visitor, larsap Dr Hari Babu Kambhampati bakah chief minister Lalduhoma leh Padma Shri Dr Ravi Kannan ten an hmanpui.
Convocation-ah hian zirlai 207 hnenah degree hlan a ni a, heng zinga 192 hi post graduate niin, under graduate 15 an awm. Gold medalist 13 leh silver medalist 14 hnenah medal hlan an ni a. India hmarchhak cheng cancer natna neite enkawl kawnga a thawhhlawk avangin Cachar Cancer Hospital & Research Centre director Dr Ravi Kannan hnenah hian ‘Degree of Doctor of Science (D.Sc. Honoris Causa) hlan a ni bawk.
Larsap chuan zirna chu hmasawnna rahbi hrang hrang inghhahna lungthu pawimawh tak a ni, tiin, “Ngaihtuahna fim leh dik min put tir a, mawihnai taka chet lak leh khawtlang tana awmze nei zawka hma lak kawngah min pui thin,” a ti. Degree dawng tharte chu finna leh thiamna nena thuam, khawvel thil thleng hrang hrang tha taka hmachhawn thei tura ngaih an ni tih a sawi a. Chona awmte pawh tha taka hlenchhuak zel thei tura beisei an ni tih a sawi a ni.
Chief minister pawhin zirlai graduate tharte chu ram leh hnam innghahna la ni mai tur an nih avangin chona thar hmachhawn ngam tur leh eizawnna bakah thil dangah pawh danglamna thlentu nih tum turin a fuih a. Mizoram zirna sang zawka seat awm indaihlohna phuhru tura ICFAI University hmalakna lawmawm a tih thu a sawi a ni.
An ni bakah hian ICFAI University chancellor Prof. YR Haragopal Reddy chuan thu a sawi a. Convocation hi ICFAI Group chairperson Sobharani Yasaswy leh hotu dang, faculty leh staff-te bakah zirlai nu leh pate an tel a ni.
ICFAI University Mizoram hi ICFAI Group hnuaiah kum 2006-a din niin, tunah zirlai 548, faculty 69 (regular 32 & visitor 37) leh administrative staff 15 an awm a. PG-ah course 11 leh UG-ah course 8, a vaiin course 19-ah zirna kalpui a ni.