IIE Guwahati-in Mizoram
zirlaite an rawn zirtir dawn
Labour, Employment, Skill Development & Entrepreneurship (LESDE) minister Lalnghinglova Hmar chuan Nilaini khan Indian Institute of Entrepreneurship Guwahati tlawhin IIE director Ishwar Chanabasappa Poojar nen an inkawm a, Mizorama skill leh entrepreneurship lama hmalakna awm thei an sawi dun.
LESDE minister chuan IIE chu Mizoram-in a la chhawr tangkai tawk lo tih sawiin, IIE kaltlanga skill leh entrepreneurship lama hmathar lak an duh a, Mizoram nen inthlunzawmna tha an mamawh tih a sawi. Ministry of Skill Development and Entrepreneurship hnuaia awm a nih angin LESDE department nen tandun a tul dan a sawi.
IIE director chuan Mizorama hna an thawh bultanna atan school thlan chhuah bikah ruahtui khawl dan zirtir a, a hmanrua leh thawktute thlangin, IIE kaltlangin ruahtui khawl leh a vawnhim lam an ngaihtuah sak dawn bakah naupangte tui renchem, tui thianghlim khawl kawnga kaihhruaina pek paha entrepreneurship an zirtir tur thu a lo hrilh.
IIE hian Mizorama tourism hmasawnna turin entrepreneurship kengtel project siam an duh thu leh, chumi kawngah chuan Mizorama sawrkar department hrang hrang sawipui an duh tih an sawi a. Tourism minister ni bawk Lalnghinglova Hmar hian tihhlawhtlin a nih tur thu a hrilh.
IIE hnuaia scheme kalpui chu Mizorama an tih dawnah MSDE zawmtu department LESDE hriattir a, anmahni kaltlanga kalpui thin turin a chah a. Sawrkar laipui, PSU leh funding source dang atanga skill leh entrepreneurship kawnga hmasawnna hna awm chu LESDE an hriattir ziah thin tur thu IIE director hian a sawi.
IIE Guwahati-in Mizoram zirlaite an rawn zirtir dawn
Get real time updates directly on you device, subscribe now.
Next Post