ILO-in thawh ho theih dan rawn enfiah
ILO-in thawh ho theih dan rawn enfiah
International Labour Organization deputy director Satoski Sasaki leh senior programme officer Divya Verma te chuan Mizoram an rawn tlawh a. Thawhtanni khan lo thlengin Labour, Employment, Skill Development & Entrepreneurship (LESDE) department hotuten an lo dawngsawng.
LESDE minister Lalnghinglova Hmar chuan Mizoram thalaite leh kuthnathawktute tana hma lak tura International Labour Organization (ILO) aiawhin an rawn tlawh chu lawmawm a tiin thawhhona tha neihpui a inhuam tih a lo hrilh a ni.
ILO deputy director chuan an Organization thil tum leh an pawl hmalakna sawifiahin, ILO hi kum 1919-a din tan niin, kum 1946 atang khan United Nations special agency pakhat a ni a, ram 187 member an awm. Geneva-ah headquarters neiin, ram 40-ah field office a nei. Khawvel puma kuthnathawktute dinhmun chawisan leh venhim kawngah hma a la a, hmalakna kal zelah Mizoram nen thawhdunna tha a awm theihnana lokal an ni tih a sawi.
ILO senior PO pawhin an hnuaia programme leh project an kalpui hrang hrang sawifiahin, Mizoram tana hmalakna awm thei apiangah kawng hawnsak an inhuam tih a sawi a ni.
LESDE secretary Lalmalsawma Pachuau chuan Mizoram thalaite tan care & hospitality sector hnuaia thawk tur mamawhna a san dan a sawi a. He sector hnuaiah hian hmeichhiaten dinhmun zau an chang tih sawiin, state flagship programme – Handholding Policy hnuaiah hnathawktute tana sawrkarin ruahmanna a siamte a sawi bawk.
LESDE director John Tanpuia’n Mizoram hnathawktute dinhmun tlangpui leh hmalakna hrang hrang a sawifiah a. MYC secretary V Lalmuanpuii chuan MYC hmalak mekna leh hmachhawp a sawi a ni.
Hemi hnu hian ILO official-te leh LESDE department hotute hmalakna kalpui dan tur sawiin an inkawm leh a; kumthar lamah Round Table meeting buatsaih an tum thu leh entrepreneurship lama hmalakna official-te tan trainer turte zirtir hmasak tum a ni. The Mizoram Private Placement Bill buatsaih mek pawh enho pui an inhuam tih ILO hotute hian an sawi bawk.
Hun hman zawhin MYC hmun an tlawh a, hmalakna kalpui dan tur sawiho a ni.